ބޭ އޮފް ބެންގަލްގައި އުފެދިފައިވާ ވަރުގަދަ ކޮޅިގަނޑެއް (ޑީޕް ޑިޕްރެޝަން) ސްރީލަންކާއާ ދިމާލަށް ދަތުރުކުރަމުންދާތީ، އެކަމުގެ ނުރައްކާ ބޮޑުވެ އެ ގައުމުގެ މޫސުމާ ބެހޭ އިދާރާއިން ރަތް ސަމާލު (ރެޑް އެލާޓް) ނެރެފިއެވެ.
ޖެނުއަރީ 8، 2026 ގެ މެންދުރުފަހު 3:30 ގައި ނެރުނު މި އިންޒާރު މިއަދު (ޖެނުއަރީ 9) ގެ 3:30 އާ ހަމައަށް ދެމިއޮންނާނެ ކަމަށް އެ އިދާރާއިން ބުނެއެވެ. މި ކޮޅިގަނޑު މިހާރު ހުރީ ޕޮޓުވިލްގެ އިރުދެކުނުން ގާތްގަނޑަކަށް 250 ކިލޯމީޓަރު ދުރުގައެވެ. ބެލެވޭ ގޮތުގައި މިއަދު އިރުއޮއްސި 5:30 އާއި ރޭގަނޑު 11:30 އާ ދެމެދު ހަމްބަންޓޮޓާ އާއި ބަޓިކަލޯއާ ދެމެދުން މި ކޮޅިގަނޑު ލަންކާގެ އައްސޭރިފަށަށް އަރާނެއެވެ.
މި މޫސުމީ ނުރައްކަލުގެ ސަބަބުން ލަންކާގެ އުތުރު، އުތުރު-މެދުތެރެ، އިރުމަތި، އޫވާ އަދި މެދުތެރޭގެ ޕްރޮވިންސްތަކަށް ބޯކޮށް ވާރޭވެހި ވައިގަދަވާނެ ކަމަށްވެސް މޫސުމާބެހޭ ވުޒާރާއިން ވަނީ ލަފާކޮށްފައެވެ.
މިނުރައްކަލާ ކުރިމަތިވެއްޖެނަމަ، ވަގުތީ ހިޔާވަހިތަކާއި ކުދި އިމާރާތްތަކަށް ގެއްލުންވުމާއި، ފުރާޅުތައް އެއްލާލުމާއި، މުވާސަލާތީ އަދި ކަރަންޓު ވިއުގައަށް ބުރޫއެރުން އެކަށީގެންވެއެވެ. މީގެ އިތުރުން ބޮޑެތި ގަސްތައް މުލުން ލުހިގެން ދިއުމާއި، ދަނޑުވެރިކަމަށް ބޮޑެތި ގެއްލުންތަކެއް ލިބުމުގެ ބިރު އެބައޮތެވެ. އައްސޭރިފަށުގެ ތިރި ސަރަހައްދުތަކުގައި ފެންބޮޑުވެ، ލޮނުގަނޑު އަރާނެ ކަމަށްވެސް ވަނީ އިންޒާރު ދީފައެވެ.
ލައްކާގެ މޫސުމާ ބެހޭ އިދާރާއިން މިހާރުވަނީ ރައްކާތެރިކަމުގެ ފިޔަވަޅެއްގެ ގޮތުން އައްސޭރިފަށުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުވުމަށާއި، ފަރުބަދަމަތީ އަދި ތިރި ސަރަހައްދުތަކުގައި ދިރިއުޅޭ މީހުން ސަމާލުވެ ތިބުމަށް އިލްތިމާސްކޮށްފައެވެ. އަދި މަގުމަތީގައި ދަތުރުކުރާ މީހުން ވެއްޓިފައި ހުރެދާނެ ގަސްތަކާއި ކަރަންޓު ނަރުތަކަށް ސަމާލުވުމަށާއި، ގުގުރާ ވަގުތުތަކުގައި ކަރަންޓު ސާމާނު ބޭނުންނުކުރުމަށްވެސް ވަނީ އަންގާފައެވެ.
މީގެ އިތުރުން އެއިދާރާއިންވަނީ ކަނޑުދަތުރުކުރާ ފަރާތްތަކަށާއި މަސްވެރިންނަށްވެސް އިތުރު އެންގުމެއް އަންގަންދެން ކަނޑުމައްޗަށް ނުކުތުން މަނާކޮށްފައެވެ.
ކިޔުންތެރިންގެ ހިޔާލު