ތުރުކީގެ ހުޅަނގު އުތުރުގައި އޮންނަ ސެންޓު އުފައްދާ ފެކްޓްރީއެއްގައި އަލިފާން ރޯވެ ހަ މީހަކު މަރުވެއްޖެއެވެ.
އަލިފާން ރޯވެފައިވަނީ ތުރުކީގެ ގަޑިން އިއްޔެ ހެނދުނު 9 ޖަހާ ކަންހާއިރު މަރްމާރާ ކަނޑު ކައިރީގައި އޮންނަ އުފެއްދުންތެރިކަމުގެ ބޮޑު މަރުކަޒެއް ކަމަށްވާ ކޮކާއެލީ ޕްރޮވިންސްގެ ޑިލޮވާސީ އޯގަނައިޒްޑް އިންޑަސްޓްރިއަލް ޒޯންގެ ފެސިލިޓީއެއްގައެވެ.
ތުރުކީގެ މީޑިއާތަކުން ރިޕޯޓްކޮށްފައިވާ ގޮތުގައި އަލިފާނުގެ ހާދިސާ ހިނގުމުގެ ކުރިން އެތަނުގައި ގިނަ ގޮވުންތަކެއް ވަނީ ގޮވާފައެވެ. މީގެ ސަބަބުން މުޅި ތަނުގައި ދުން ފެތުރުމުން ކުއްލި ހާލަތުގައި ދޭ ހިދުމަތްތައް ދޭން ޖެހުނު ކަމަށް ރިޕޯޓުތައް ބުނެއެވެ.
މިކަމާ ގުޅިގެން ގަވަރުނަރު އިލްހަމީ އަކްތާޝް ވިދާޅުވީ އަލިފާންގަނޑު ކޮންޓްރޯލް ކުރެވުނީ ވަރަށް ގިނައިރު ވަންދެން މަސައްކަތް ކުރުމަށް ފަހުގައި ކަމަށެވެ.
“ހުރިހާ މަސައްކަތެއް ކުރި ނަމަވެސް މި ހިތާމަވެރި ހާދިސާގައި އަޅުގަނޑުމެންގެ ހަ ރައްޔިތެއްގެ ފުރާނަ ވަނީ ގެއްލިފައި،” ހާދިސާ ހިނގި ސަރަހައްދުގައި ނޫސްވެރިންނާ ވާހަކަ ދައްކަވަމުން އޭނާ ވިދާޅުވިއެވެ.
“އަލިފާންގަނޑު މުޅިން ކޮންޓްރޯލްކޮށް، އެ ތަން ރައްކާތެރި ސަރަހައްދަކަށް ބަދަލު ކުރުމުގެ މަސައްކަތްތައް ކުރިއަށް އެބަދޭ.”
އެ ނޫސް އެޖޭންސީން ރިޕޯޓު ކުރި ގޮތުގައި ޒަހަމްވި ގެބްޒޭ ފާތިހު ނަމަކަށް ކިޔާ މަސައްކަތު މީހަކު، ސްޓޭޓް ހޮސްޕިޓަލަށް ގެންދެވުނުއިރު، ވަނީ ވަރަށް ބޮޑަށް އަނިޔާވެފައެވެ. އޭނާ ވަރަށް ބޮޑަށް ފިހިގެން، އޭނާގެ ނޭވާލާ ނިޒާމަށް އަސަރު ކޮށްފައިވާ ކަމަށް އެ ނޫސް އޭޖެންސީން ބުނެއެވެ.
ތުރުކީގެ ކަމާބެހޭ ފަރާތްތަކުން ވަނީ އަލިފާން ރޯވާން މެދުވެރިވި ސަބަބު ދެނެގަތުމަށް ތަހުގީގު ފަށައިފައެވެ. މިހާތަނަށް އަދި މި ހާދިސާ ހިންގަން މެދުވެރިވި ސަބަބު އެނގިފައެއް ނުވެއެވެ.
ކިޔުންތެރިންގެ ހިޔާލު