ޣައްޒާގެ އަލް-ޝިފާ ހޮސްޕިޓަލްގެ މައި ދޮރުމަތީގައި ނޫސްވެރިން ހިޔާވަހިކަން ހޯދައިގެން ތިބި މީޑިއާ ޓެންޓަށް އިޒްރޭލުން ގަސްތުގައި ދިން ހަމަލާއެއްގައި، އަލްޖަޒީރާގެ ނޫސްވެރިޔާ އަނަސް އަލް-ޝަރީފް (28 އަހަރު) އާއި އޭނާގެ ހަތަރު އެކުވެރިން ޝަހީދުވެއްޖެއެވެ.
އަލްޖަޒީރާގެ ރިޕޯޓަރު ހާނީ އަލް-ޝާޢިރު ބުނީ، އިޒްރޭލުގެ ޑްރޯނެއް ޓެންޓައް ހަމަލާދީފައި ވަނީ މިދިޔަ އާދިއްތަ ދުވަހުގެ ރޭ 11:35 ހާއިރު ކަމަށެވެ. މި ހަމަލާގައި ޖުމްލަ ހަތް މީހުން ޝަހީދުވެފައިވާ ކަމަށް ރިޕޯޓްތައް ބުނެއެވެ. ޝަހީދުވި މީހުންގެ ތެރޭގައި އަލްޖަޒީރާގެ ކޮރެސްޕޮންޑެންޓް މުޙައްމަދު ގުރައިގާ (33 އަހަރު) އާއި ކެމެރާ އޮޕަރޭޓަރުން ކަމަށްވާ އިބްރާހިމް ޒާހިރު (25 އަހަރު)، މުޙައްމަދު ނޫފަލް (29 އަހަރު) އަދި މުޢުމިން ޢަލީވާ (23 އަހަރު) ހިމެނެއެވެ.
މިއީ ޣައްޒާގައި ހިނގަމުންދާ ހަނގުރާމަ ކަވަރުކުރަމުންދާ އަލްޖަޒީރާގެ ނޫސްވެރިންނަށް އިޒްރޭލުން ހަމަލާދިން ފުރަތަމަ ފަހަރެއް ނޫނެވެ. މީގެ ކުރިންވެސް އަލްޖަޒީރާގެ ފަސް ނޫސްވެރިއަކު ވަނީ އިޒްރޭލުގެ ހަމަލާތަކުގައި ޝަހީދުވެފައެވެ.
މީގެ ކުރިން، ނޫސްވެރިޔާ ސާމިރު އަބޫދަގާ ޣައްޒާ ބިއުރޯގެ ވެރިޔާ ވަޢިލް ދަހްދޫހުއާ އެކު ރިޕޯޓްކުރަމުން ދަނިކޮށް އިޒްރޭލުގެ ވައިގެ ހަމަލާއެއްގައި އޭނާ ވަނީ ޝަހީދުކޮށްލާފައެވެ. މި ހަމަލާގައި ވަޢިލް ދަހްދޫހަށްވެސް ވަނީ އަނިޔާވެފައެވެ. ހާން ޔޫނިސްގައި ހުންނަ ފަރުހާނާ ސްކޫލްގައި ފިލްމު ކުރަމުން ދަނިކޮށް ދިން މި ހަމަލާއަށް ފަހު، އެމަޖެންސީ ފަޔާރ ވޯކަރުންނަށް އެ ސަރަހައްދަށް ދިއުމަށް އިޒްރޭލު ސިފައިން ހުރަސް އެޅުމުގެ ސަބަބުން، އަބޫދަގާ ވަނީ ލޭ ހުސްވެގެން މަރުވެފައެވެ.
ނޫސްވެރިންނަކީ ހަނގުރާމައިގެ ސަރަހައްދުތަކުގައި ޚަބަރު ފޯރުކޮށްދިނުމުގެ މުހިންމު މަސައްކަތެއް ކުރާ ބަޔަކަށް ވާއިރު، އެފަދަ ހަމަލާތަކަކީ ބައިނަލްއަޤްވާމީ ޤާނޫނުތަކާއި އިންސާނީ ހަމަތަކާ ޚިލާފު ޢަމަލުތަކެއް ކަމަށް ބައިނަލްއަޤްވާމީ ޖަމާޢަތްތަކުން ވަނީ ފާހަގަކޮށް އެހަމަލާ ކުށްވެރިކޮށްފައެވެ.
ކިޔުންތެރިންގެ ހިޔާލު