އިޒްރޭލުން ޣައްޒާ އެއްކޮށް ހިފާ، އެ ސަރަހައްދުގެ ރައްޔިތުން ދެކުނުގައިވާ ކޮންސެންޓްރޭޝަން ޒޯނުތަކަށް ގެންދަން އުޅޭ އުޅުމާ ދެކޮޅަށް، ޣައްޒާގެ ރައްޔިތުން ވަރުގަދަ އަޒުމަކާއެކު ތިބިތަނުން ނުދާނެ ކަމަށް ބުނެފިއެވެ. މިކަމަށްޓަކައި އެ މީހުން ދިރިއުޅޭނި ވެސް އަދި މަރުވާނީ ވެސް ޣައްޒާގައި ކަމަށް ޣައްޒާގެ ރައްޔިތުން ވަނީ ހާމަކޮށްފައެވެ.
ޣައްޒާގައި ދިރިއުޅެމުންދާ މީހެއްކަމަށްވާ އުއްމު އިމްރާން، އަލްޖަޒީރާ މީޑިއާއާ ވާހަކަދައްކަމުން ވިދާޅުވީ، އިޒްރޭލުން އެ މީހުންނަށް ޣައްޒާގެ ދެކުނަށް ދިއުމަށް އަންގަމުންދާ ކަމަށެވެ. ނަމަވެސް އެ ސަރަހައްދުވެސް އަމާން ނޫންކަމުގައިވާތީ، މިހާރު ތިބިތަނުން ނުދިޔުން މާ ރަނގަޅު ކަމަށް އޭނާ ވަނީ ފާހަގަކޮއްފައެވެ.
އޭގެ އިތުރަށް، ޣައްޒާގެ ދަނޑިވަޅު ތެރޭގައި ހުރި އުއްމު ޔާސިރު ބުނި ގޮތުގައި، އެ މީހުން ޣައްޒާ ދޫކޮށް ދުވަހަކު ވެސް ނުދާނެއެވެ. “އަހަރުމެން ދިރިއުޅޭނީ ވެސް އަދި މަރުވާނީ ވެސް ޣައްޒާގައި. ގެތައް ގޮއްވާލިޔަސް، ދަރިފަސްކޮޅު މަރާ ހުސްކުރިޔަސް، އަހަރުމެން ޣައްޒާ ދޫކޮށްދާން އެއްބަސްނުވާނަން،” އޭނާ ބުންޏެވެ. މި ބަސްތަކުން ދައްކުވައިދެނީ ޣައްޒާގެ ރައްޔިތުންގެ ވަރުގަދަ އަޒުމެވެ.
އިޒްރޭލުން ދާދި ފަހުން ޣައްޒާ އެއްކޮށް ހިފަން ބިލެއް ފާސްކޮށްފައިވާއިރު، އިޒްރޭލުގެ މި އަމަލަށް ބައިނަލްއަގްވާމީ ފާޑުކިޔުން ވަނީ އަމާޒުވެފައެވެ. ދުނިޔޭގެ ބާރުގަދަ އެތައް ގައުމަކުން ވަނީ އިޒްރޭލުގެ މި އަނިޔާވެރި އަމަލުތައް ހުއްޓުމަށް ގޮވާލައިފައެވެ. ނަމަވެސް މި ހުރިހާ ކަމަކަށް ބީރު ކަންފަތެއް ދީގެން އުޅޭ އިޒްރޭލުން އަންނަނީ އެ މީހުންގެ އަނިޔާވެރި ރޭވުންތައް ހަގީގަތަކަށް ހެދުމަށް މަސައްކަތް ކުރަމުންނެވެ.
ކިޔުންތެރިންގެ ހިޔާލު