އިންޑިއާގައި މޫސުން ގޯސްވެ، ވެހުނު ވާރެ އާއެކީ އައި ގުގުރުމާ ވިދުމާއެކު، ކުރިމަތިވި ހޮނު އެޅުމުގެ ހާދިސާގައި 33 މީހަކު މަރުވެއްޖެއެވެ.
އިންޑިއާގެ އިރުމަތީ ސަރަހައްދައް ކުރަމުންދާ މި ވިއްސާރައިގަ ކުރިމަތިވި ހޮނު އެޅުމުގެ ހާދިސާގައި 33 މީހުން މަރުވެ އެތައް ބަޔަކު ޒަހަމްވެފައިވާކަމަށް މިއަދު އިންޑިއާގެ ކަމާ ބެހޭ އިދާރާތަކުން ހާމަކޮށްފައިވެއެވެ، ހޮނު އެޅުމުގެ ހާދިސާތައް ހިނގާފައިވަނީ މިދިޔަ ބުދަ ދުވަހާއި ބުރާފަސްތި ދުވަހު ބިހާރު ސްޓޭޓްގައިކަމަށް ރިޕޯޓުތައް ބުނެއެވެ.
ބިހާރު ސްޓޭޓް ގެ އިސްވެރިންވަނީ މަރުވި މީހުންގެ އާއިލާތަކަށް 4 މިލިއަން ރުޕީސް (ގާތްގަނޑަކަށް 4،600 ޑޮލަރު)ގެ ބަދަލު ދޭނެ ކަމަށް އިއުލާންކޮށްފަ އެވެ. ރިޕޯޓުތައް ބުނާގޮތުން މޫސުން ގޯސްވުމުގެ ހާދިސާތަކުގައި އެންމެ ހާލުގައި ޖެހިފައިވަނީ ތޫފާނުގެ ތެރޭގައި ތާށިވެފައި ތިބި ދަނޑުވެރިންނާއި، ލޭބަރުންނެވެ.
އިންޑިއާގެ މޫސުން ލަފާ ކުރާ އިދާރާތަކުން ވަނީ ކުރިއަށް އޮތް ދުވަސްތަކުގައި އިތުރަށް މޫސުން ގޯސްވެ ވާރޭ ވެހޭނެ ކަމުގެ އިންޒާރު ވެސް ދީފައެވެ.
އިންޑިއާގެ އިރުމަތީ ސަރަހައްދަކީ މޫސުން ގޯސްވެ ހޮނު އެޅުމުގެ ހާދިސާތައް ގިނައިން ތަހައްމަލު ކުރާ ސަރަހައްދެކެވެ. އެގޮތުން މޫސުން ގޯސްވެ ކުރިމަތިވި އެކި ހާދިސާ ތަކުގައި 2024 ވަނަ އަހަރު 243 މީހުން މަރުވެފައިވާއިރު 2023 ވަނަ އަހަރު 275 މީހުން މަރުވެފައިވާ ކަމަށް ވެސް ރިޕޯޓްތައް ބުނެ އެވެ.
ކިޔުންތެރިންގެ ހިޔާލު