އިންޑިއާގެ ވެރިރަށް، ދިއްލީގެ ތިން ސްކޫލަކަށް ބޮމުގެ އިންޒާރު ދީފިއެެވެ.
ދިއްލީގެ ތިން ސްކޫލަކަށް ބޮމުގެ އިންޒާރު ދީފައިވަނީ އިއްޔެ ހެނދުނު ކަމަށާއި އިމަޖެންސީ ސާވިސް އިން އެކަމުގައި ހަރަކާތްތެރިވެފައި ވާކަމަށް ދިއްލީ ފުލުހުން ބުނެއެވެ.
ފުލުހުންގެ އޮފިޝަލުން ބުނެފައިވާ ގޮތުގައި، އިއްޔެ ހެނދުނު 08:00 ހާއިރު ބޮމުގެ އިންޒާރުގެ ކޯލުތަކާއި އީމެެއިލްތައް ދިއްލީގެ ސީއެފްއާރް ސްކޫލްތަކަށް ލިބިފައިވެއެވެ. ސީއެފް އާރް ސްކޫލްތަކަކީ އިންޑިއާގެ ފުލުހުން ހިންގާ ސްކޫލުތަކެކެވެ. ބޮމުގެ އިންޒާރު ލިބިފައިވަނީ ދިއްލީގެ ޕްރަސަންތް ވިހާރް އާއި ދިވާކާ ސެކްޓާ 16 ގެ އިތުރުން ޗަނާކްޔަޕޫރީ ސަރަހައްދުތަކުގައި ހުރި ސްކޫލްތަކަށް ކަމަށް އޮފިޝަލުން ބުނެއެވެ.
ބޮމުގެ އިންޒާރު ލިބުމާއެކު އެ ސްކޫލުތައް ހިމެނޭ ސަރަހައްދުތައް ބަންދުކޮށް ކަމާބެހޭ ފަރާތްތަކުން އެ ސަރަހައްދުތަކުގައި ހަރަކާތެރިވެފައިވާކަމަށް އޮފިޝަލުން ބުނެއެވެ.
ދިއްލީގެ ފުލުހުންގެ އޮފިޝަލުން ވަނީ ބޮމުގެ އިންޒާރު ލިބުނު ސްކޫލުތަކާއި އެ ސްކޫލްތައް ހިމެނޭ ސަރަހައްދުތަކުން ބޮމެއް ނުވަތަ އެފަދަ އެއްޗަކާ ގުޅޭ އެއްވެސް އެހެން އެއްޗެއްވެސް ފެނިފައި ނުވާކަމަށް ބުނެފައެވެ.
ކިޔުންތެރިންގެ ހިޔާލު