ފަލަސްތީނުގެ ޣައްޒާގައި، އިޒްރޭލުން ދެމުންދާ ވަރުގަދަ ހަމަލާތަކުގައި ފާއިތުވެދިޔަ 48 ގަޑިއިރު ތެރޭގައި 130 އަށް ވުރެ ގިނަ ފަލަސްތީނުގެ ރައްޔިތުން ޝަހީދުކޮށްލާފައިވާކަމަށް ރިޕޯޓުތައް ބުނެފިއެވެ. ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ. މި ހަމަލާތަކުގެ ސަބަބުން މިހާރު ޝަހީދުވި ފަލަސްތީނު ރައްޔިތުންގެ އަދަދު ވަނީ 59،000 އަށް ވުރެ މައްޗަށް އަރާފައެވެ.
މި ހަމަލާތަކުގައި ޝަހީދުވި ގިނަ ބަޔަކީ، ކާބޯތަކެއްޗާއި ބޯފެނުގެ ދަތިކަން ވަރަށް ބޮޑަށް ކުރިމަތިވެފައިވާ ޣައްޒާގައި، އިންސާނީ އެހީ ދޭ ކޭމްޕްތަކަށް ގޮސް، އެހީ ހޯދައިގެން އެނބުރި އަންނަނިކޮށް ދެވުނު ހަމަލާތަކުގައި ޝަހީދުވި މީހުން ކަމަށް މައުލޫމާތު ލިބެއެވެ. މިއީ އިންސާނިއްޔަތާ ޚިލާފު ނުރައްކާތެރި ޖަރީމާއެއް ކަމަށް ބައިނަލްއަޤްވާމީ ޖަމާޢަތްތަކުން ވަނީ ސިފަކޮށްފައެވެ.
ޣައްޒާގައި ހިނގަމުންދާ މި ހަމަލާތަކުގެ ސަބަބުން އެތައް ހާސް ބަޔަކު ގެދޮރު ނެތި ބިކަވެފައިވާއިރު، ބޭސްފަރުވާއާއި ކާބޯތަކެތީގެ ދަތިކަން ވަނީ އިންތިހާއަށް ބޮޑުވެފައެވެ. ބައިނަލްއަޤްވާމީ މުޖުތަމަޢުއިން ވަނީ މި ހަމަލާތައް ހުއްޓާލުމަށް ގޮވާލާފައެވެ.
ކިޔުންތެރިންގެ ހިޔާލު