އެހީ ހޯދަން ނިކުމެ އުޅޭ މީހުން މަރާފައިވާ އަދަދު 800 އަށް އަރައިފިއެވެ. އެމެރިކާގެ ކުލީ ސިފައިން ގެންދަނީ ޣައްޒާގައި އެހީދިނުމަށް މަރުކަޒުތައް ހުޅުވައިގެން އިޒްރޭލުގެ ޒަޔަނިސްޓު ސިފައިންނާ ގުޅިގެން އެތަންތަން ހިންގަމުންނެވެ. އަދި އެހީ ހޯދަން އަންނަ މީހުންނާ ދިމާއަށް ބަޑި ޖަހައި ކޮންމެ ދުވަހަކުވެސް އެތަކެއް މީހުންނެއް މަރަމުން ދެއެވެ.
ޣައްޒާގެ ސަރުކާރުގެ މީޑިއާ އޮފީހުން ބުނާ ގޮތުގައި އެހީ ބަހާ ތަންތަން ހިންގާ އެމެރިކާގެ ކުލީ ސިފައިން ދަނީ “ނިޒާމީ ގޮތެއްގައި އިޒްރޭލުން ބަނޑަށް ޖައްސާފައވާ އާންމުން އެހީ ހޯދަން ދިއުމުން އެމީހުންނާ ދިމާއަށް ބަޑި ޖަހައި މަރަމުންނެވެ.”
ޣައްޒާގެ މީޑިއާ އޮފީހުން ނެރެފައިވާ ހަރުކަށި ބަޔާނެއްގައި ބުނެފައި ވަނީ “ފަލސްޠީނުގެ ނަސްލު ނައްތާލުމުގެ މަސައްކަތް ވިލަރެސްކުރެވި އިންތިޒާމު ވެގެން ދަނީ އެމެރިކާގެ ފާރަވެރިކަމާއެކު އަދި އެކަމުގައި ބައިވެރިވާ އެހެން ދައުލަތްތަކުގެ ވާގިވެރިކަމާއެކު” ގައި ކަމަށެވެ. އަދި ޣައްޒާއަށް އެހ ދިނުމުގެ ނަމުގައި ހިންގަނީ މަރުގެ ދަންތުރައެއް ކަމަށް ބުނެފައިވެއެވެ.
ޣައްޒާ މީޑިއާ އޮފީހުން ބުނިގޮތުގައި އެހީ ހޯދަން އުޅެނިކޮށް 805 މީހުން ވަނީ ޝަހީދުކޮށްލާފައި އަދި 5،252 މީހުން ވަނީ ޒަޚަމް ކޮށްލައިފައި އެމެރިކާގެ ކުލީ ސިފައިން އެހީ ދޭން ފެށިފަހުން ބަޔާޅީސް މީހަކު ވަނީ ވަގަށް ނަގާފައި ކަމަށް ރިޕޯޓްކޮށްފައިވެއެވެ.
ކިޔުންތެރިންގެ ހިޔާލު