ޣައްޒާގެ ދީރުލް ބަލާޙުގައި ހުންނަ އަލް އަޤްޞާ މާޓިޔާސް ހޮސްޕިޓަލް ކައިރީގައި ހުރި ކާބޯތަކެތި ބަހާ މަރުކަޒަކަށް ޔަހޫދީ އިސްތިއުމާރީ ބާރުތަކުން ދިން ޑްރޯން ޙަމަލާއެއްގައި ތިން މީހުން ޝަހީދުވެއްޖެއެވެ. މީގެ އިތުރުން ޚާން ޔޫނިސްގައި އާންމުން އެއްވެ އުޅުނު ސަރަޙައްދަކަށް ދިން ޙަމަލާއެއްގައި އެކަކު ޝަހީދުވެ ހަތަރު މީހަކު ވަނީ ޒަޚަމްވެފައެވެ.
ޔަހޫދީ އަސްކަރިއްޔާގެ ޓޭންކުތަކާއި އުޅަނދުތައް ވަނީ ޚާން ޔޫނިސްގެ އިރުމަތީގައިވާ ބަނީ ސުހައިލާ އަވަށަށް ވަދެގަނެ، ބަޑިންނާއި ޓޭންކަރުން ވަރުގަދަ ޙަމަލާތަކެއް ދީފައެވެ. މި ޙަރަކާތުގެ ތެރެއިން ޔަހޫދީން ވަނީ އެމީހުންގެ ބާރުގެ ދަށުގައިވާ ސަރަޙައްދު ވަކިކުރާ ރީނދޫ ރޮނގު ހުޅަނގަށް ޖައްސައި، ވެރިވެގަނެފައިވާ ސަރަޙައްދު އިތުރަށް ފުޅާކޮށްފައެވެ.
ޙަމަލާ ބަދަލުކުރުން މެދުކަނޑާލުމުގެ އެއްބަސްވުމެއް އޮތް ނަމަވެސް، ޔަހޫދީން ދަނީ ތަކުރާރުކޮށް ޣައްޒާއަށް ޙަމަލާދެމުންނެވެ. އެއްބަސްވުމަށް ޢަމަލުކުރަން ފެށި ފަހުން ވެސް 870 މީހުން ޝަހީދުކޮށްލާފައިވާއިރު، 2023 އޮކްޓޯބަރުން ފެށިގެން މިހާތަނަށް ޖުމްލަ 72,600 އަށްވުރެ ގިނަ މީހުން ވަނީ ޝަހީދުވެފައެވެ.
ކިޔުންތެރިންގެ ހިޔާލު