ރަޝިޔާގެ އަސްކަރީ މުދާ އުފުލާ އޭއެން-26 މަރުކާގެ މަތިންދާބޯޓެއް ކްރައިމިއާގެ ފަރުބަދައެއްގައި ޖެހި ހިނގި ނުރައްކާތެރި ހާދިސާގައި، އޭގައި ދަތުރުކުރި 29 މީހުން މަރުވެއްޖެއެވެ.
ރަޝިޔާގެ ތާސް ނިއުސް އެޖެންސީން ބުނި ގޮތުގައި، ވެއްޓިފައިވަނީ އޭއެން-26 މަރުކާގެ އަސްކަރީ މުދާ އުފުލާ ބޯޓެކެވެ. މި ހާދިސާ ހިނގާފައިވަނީ 2014 ވަނަ އަހަރު ރަޝިޔާއިން ޔޫކްރެއިން އަތުން އަތުލާފައިވާ ކްރައިމިއާ ޕެނިންސިއުލާގައެވެ. މި ހާދިސާގައި ބޯޓުގައި ތިބި 23 ފަސިންޖަރުންނާއި 6 ފަޅުވެރިން ހިމެނޭހެން ހުރިހާ އެންމެން ވަނީ މަރުވެފައެވެ.
ކްރައިމިއާގެ މަތިން އުދުހެމުން ދަނިކޮށް ބޯޓުގެ މުއާސަލާތީ ގުޅުން ވަނީ މެދުކެނޑިފައެވެ. ޓާސް އެޖެންސީން އިތުރަށް ރިޕޯޓުކޮށްފައިވާ ގޮތުގައި، ގުޅުން ކެނޑުނު މި ބޯޓު ވެއްޓިފައިވަނީ ފަރުބަދައެއްގެ އުސް ފަރާތަކަށެވެ. މިހާތަނަށް ބެލިބެލުމުން މި ހާދިސާ ހިނގަން މެދުވެރިވީ ބޯޓަށް ދިމާވި ޓެކްނިކަލް މައްސަލައެއްގެ ސަބަބުން ކަމަށް ބެލެވެއެވެ.
އޭއެން-26 މަރުކާގެ ބޯޓުތަކަކީ 1960 ގެ އަހަރުތަކުން ފެށިގެން ބޭނުންކުރަމުން އަންނަ ބޯޓުތަކެކެވެ. މިއީ މުދާ އުފުލުމަށާއި އަސްކަރީ ބޭނުންތަކަށް ބޭނުންކުރާ ބޯޓެއް ނަމަވެސް، ފާއިތުވި ދިހަވަރަކަށް އަހަރު ތެރޭގައި މި މަރުކާގެ ބޯޓުތަކަށް ނުރައްކާތެރި ގިނަ ހާދިސާތަކެއް ވަނީ ކުރިމަތިވެފައެވެ.
އެގޮތުން 2022 ވަނަ އަހަރު ޔޫކްރެއިންގެ ޒަޕޮރިއްޒިއާގައި މިފަދަ ބޯޓެއް ވެއްޓި މީހަކު މަރުވެފައިވާއިރު، 2020 ވަނަ އަހަރު ޔޫކްރެއިންގައި ހިނގި އެހެން ހާދިސާއެއްގައި 26 މީހުން ވަނީ މަރުވެފައެވެ. މީގެ އިތުރުން ދެކުނު ސޫދާނާއި އައިވަރީ ކޯސްޓުގައިވެސް މި މަރުކާގެ ބޯޓުތައް ވެއްޓި މީހުން މަރުވުމުގެ ހާދިސާތައް ފާއިތުވި އަހަރުތަކުގައި ވަނީ ހިނގާފައެވެ.
ކިޔުންތެރިންގެ ހިޔާލު