އީރާނާއެކު ކުރަމުންދާ ހަނގުރާމައިގެ ފާއިތުވި ހަތަރު ހަފުތާގެ ތެރޭގައި އެމެރިކާ ސިފައިން 850 އަށްވުރެ ގިނަ ޓޮމަހޯކް މިސައިލް ފޮނުވާލައިފިއެވެ. ވޮޝިންގޓަން ޕޯސްޓުން ރިޕޯޓްކޮށްފައިވާ ގޮތުގައި، އަހަރެއްގެ މައްޗަށް އުފެއްދެނީ މަދު އަދަދެއްގެ މިސައިލް ކަމަށްވާއިރު، މިހާ ހަލުވި މިނެއްގައި މިސައިލްތައް ބޭނުންކުރަމުންދާތީ ޕެންޓަގަންގެ ބައެއް އިސްވެރިން ވަނީ ކަންބޮޑުވުން ފާޅުކޮށްފައެވެ. އަދި އިތުރު މިސައިލް ހޯދޭނެ ގޮތްތަކާ މެދު މިހާރު ދަނީ މަޝްވަރާ ކުރެވެމުންނެވެ.
މި ރިޕޯޓުގައިވާ ގޮތުން، އެންމެ ޓޮމަހޯކް މިސައިލެއް އުފެއްދުމަށް ދެ އަހަރާ ގާތްކުރާ މުއްދަތެއް ހޭދަވާއިރު، މީގެ ކޮންމެ މިސައިލަކަށް 3.6 މިލިއަން ޑޮލަރު ހޭދަވެއެވެ. މީގެ އިތުރުން، މިދިޔަ އަހަރުގެ ބަޖެޓުގައި ހިމަނާފައިވަނީ އެންމެ 57 މިސައިލެވެ.
އިސް އޮފިޝަލަކު ވިދާޅުވި ގޮތުގައި މެދުއިރުމަތީގައި ހުރި ޓޮމަހޯކް މިސައިލްގެ އަދަދު ވަނީ ކަންބޮޑުވާ މިންވަރަށް މަދުވެފައެވެ. އަދި އެހެން އޮފިޝަލަކު ވިދާޅުވީ، މިއަށް އެކަށީގެންވާ ހައްލެއް ނުގެނެވިއްޖެނަމަ، އެ ސަރަހައްދުގައި ހުރި މިސައިލްތައް ވަރަށް އަވަހަށް ހުސްވެދާނެ ކަމަށެވެ.
ވޮޝިންގޓަން ޕޯސްޓަށް މަޢުލޫމާތު ދިން އެމެރިކާގެ ބައެއް އޮފިޝަލުން ވިދާޅުވި ގޮތުގައި، ދުނިޔޭގެ އެހެން ސަރަހައްދުތަކުގައި ހުރި މިސައިލްތައް ގެނައުމާ މެދު ނުވަތަ އިތުރު މިސައިލް އުފެއްދުމާ މެދު މިހާރު ދަނީ ގޮތްތަކެއް ނިންމުމަށް މަޝްވަރާ ކުރެވެމުންނެވެ.
ނަމަވެސް، ޕެންޓަގަންގެ ތަރުޖަމާނު ޝޯން ޕާނެލް ވިދާޅުވީ، ރައީސް ކަނޑައަޅުއްވާ ވަގުތަކާއި ތަނެއްގައި، ކޮންމެ މިޝަނެއް ފުރިހަމަކުރުމަށް ބޭނުންވާ ހުރިހާ ވަސީލަތެއް އެމެރިކާގެ އަސްކަރިއްޔާގައި އެބަހުރި ކަމަށެވެ. ޕާނެލް އިތުރަށް ވިދާޅުވީ، މީޑިއާއިން މަސައްކަތް ކުރަނީ ދުނިޔޭގެ އެންމެ ވަރުގަދަ އަސްކަރިއްޔާ އަކީ ބަލިކަށި ބައެއްގެ ގޮތުގައި ދެއްކުމަށް ކަމަށެވެ.
މީގެ އިތުރުން، އެމެރިކާގެ ޕްރެސް ސެކްރެޓަރީ ކެރޮލީން ލީވިޓް ވެސް ވަނީ މި ކަންބޮޑުވުންތަކަށް ރައްދު ދެއްވާފައެވެ. އޭނާ ވިދާޅުވީ، ރައީސް ޓްރަމްޕް އިރުޝާދު ދެއްވާފައިވާ “އޮޕަރޭޝަން އެޕިކް ފިއުރީ” ގެ ލަނޑުދަނޑިތައް ހާސިލުކުރުމަށް ބޭނުންވާ ވަރަށްވުރެ އިތުރަށް ވެސް ހަތިޔާރާއި ވަޒަން އެމެރިކާގެ އަސްކަރިއްޔާގައި އެބަހުރި ކަމަށެވެ.
ޕެންޓަގަންގެ ވެރިޔާ މާރޗް 5 ވަނަ ދުވަހު ނޫސްވެރިންނަށް މަޢުލޫމާތު ދެއްވަމުން ވިދާޅުވީ، ހަތިޔާރުގެ އެއްވެސް ދަތިކަމެއް ނެތް ކަމަށާއި، ބޭނުންވާހާ ދުވަހަކު މި ހަނގުރާމަ ކުރިއަށް ގެންދިއުމުގެ ގާބިލުކަން އެމެރިކާއަށް އެބައޮތް ކަމަށެވެ. އެހެންނަމަވެސް، މުހިންމު ހަތިޔާރުތައް ފޯރުކޮށްދިނުން އަވަސްކުރުމަށް އޭނާ އަމިއްލަފުޅަށް ދިފާއީ ކުންފުނިތަކުގައި އެދިވަޑައިގެންފައިވާ ކަމަށް ރިޕޯޓުތައް ބުނެއެވެ.
ސެންޓަރ ފޯރ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒްގެ ސީނިއާ އެޑްވައިޒަރެއް ކަމަށްވާ މާކް ކެންސިއަން ވިދާޅުވީ، 800 އަށްވުރެ ގިނަ ޓޮމަހޯކް މިސައިލް ބޭނުންކުރުމުގެ ސަބަބުން، ހުޅަނގު ޕެސިފިކް ސަރަހައްދުގައި ކުރިމަތިވެދާނެ ހަނގުރާމައަކަށް ބޮޑު ހުސްކަމެއް އައިސްފައިވާ ކަމަށެވެ. އެ ޖަމްޢިއްޔާގެ އަންދާޒާތަކުން ދައްކާ ގޮތުގައި ހަނގުރާމަ ފެށުނުއިރު އެމެރިކާގެ ކަނޑުގެ ސިފައިންގެ އަތުގައި ހުރީ ގާތްގަނޑަކަށް 3,100 މިސައިލެވެ.
އޭނާ އިތުރަށް ފާހަގަކުރެއްވި ގޮތުގައި، ބޭނުންކުރެވުނު އަދަދު އަލުން ފޫބެއްދުމަށް އެތައް އަހަރެއް ނަގާނެއެވެ.
ޓޮމަހޯކް މިސައިލަކީ 1991 ވަނަ އަހަރުގެ ޕާޝިއަން ގަލްފް ހަނގުރާމައިގައި އެމެރިކާއިން އެންމެ ފުރަތަމަ ބޭނުންކުރަން ފެށި، އަދި އެއަށްފަހު އެމެރިކާގެ އަސްކަރިއްޔާގެ މުހިންމު ހަތިޔާރަކަށް ވެފައިވާ މިސައިލެކެވެ.
މި މިސައިލަކީ 1,000 މޭލަށްވުރެ ދުރަށް ދަތުރުކުރުމުގެ ގާބިލުކަން ލިބިފައިވާ، އަދި ކަނޑުގެ މަތީ އުޅަނދުތަކާއި ސަބްމެރިންތަކުން ފޮނުވާލެވޭ މިސައިލެކެވެ. މީގެ ސަބަބުން، ވަރުގަދަ ދިފާއީ ނިޒާމުތައް ހުންނަ ސަރަހައްދުތަކަށް ޕައިލެޓުން ވަނުމުގެ ބަދަލުގައި، ދުރުގައި ތިބެގެން ހަމަލާދިނުމުގެ ފުރުސަތު ލިބިގެންދެއެވެ.
ކިޔުންތެރިންގެ ހިޔާލު