ދުޅަހެޔޮ މުޖުތަމައު އެއް ބިނާކުރަން ސަރުކާރުން ކުރަމުންދާ މަސައްކަތްތަކުގެ ތެރެއިން، ކާޑުގެ ބާވަތްތަކުގެ ތެރޭގައި މިހާރު ހިމަނާފައިވާ ހަކުރަށް ދޭ ސަބްސިޑީ ކަނޑާލަން މަޝްވަރާކުރަމުންދާ ކަމަށް، ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.
ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ކުރި ސުވާލަކަށް ޖަވާބު ދެއްވަމުން ނާޒިމް ހަކުރު އެކުލެވޭ ބާވަތްތަކުން ޓެކްސް ނެގުމަކީ އާއްމުންގެ ދިރިއުޅުމުގެ ވައްޓަފާޅިއާ ގުޅޭ ކަމަކަށް ވާތީ، އެ ކަންތައްތައް ވަކި އުސޫލެއްގެ ތެރެއިން ރެގިއުލޭޓް ކުރަމުން އަންނަ ކަމަށެވެ.
ސަރުކާރުން ވޭޕާއި ވަކި އުމުރަކަށް ދުންފަތުގެ ބާވަތްތައް މަނާކުރުމުގެ އިތުރުން ޝީޝާ ވެސް މަނާކުރުމަށް މަޝްވަރާ ކުރެވެމުންދާ ކަމަށް ނާޒިމް ވިދާޅުވި އެވެ.
އަދި ހަކުރުން ދޭ ސަބްސިޑީ ކަނޑާލައި، ޓެކްސް ނަގަން ފެށުމަކީ ވެސް އެ މަޝްވަރާތަކުގެ ތެރޭގައި ހިމެނޭކަމެއް ކަން އޭނާ ހާމަކުރެއްވި އެވެ.
“އަޅުގަނޑުމެން އެކި ލެވެލްގައި އެބަ ކުރެވޭ. ކިހާ ހިސާބެއްގައި ތޯ މުޅިން ތަންފީޒުވެގެން ދާނީ، އެއީ ކަންނޭނގެ އުފެދޭނެ ސުވާލަކީ. އެންމެ މުހިއްމު ދަނޑިވަޅުގައި، މުހިއްމު ހާލަތުގައި، މުހިއްމު ވަގުތުގައި އެކަންކުރުން ވަރަށް މުހިއްމު،” ނާޒިމް ވިދާޅުވި އެވެ.
ކިޔުންތެރިންގެ ހިޔާލު