މިދިޔަ އޮގަސްޓް މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 84 މައްސަލައެއް ރިޕޯޓްކޮށްފައިވާ ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާ ވިދާޅުވެއްޖެއެވެ.
އެ ވުޒާރާގެ ތަފާސްހިސާބުތަކުން ދައްކާ ގޮތުގައި މިދިޔަ މަހު 200 އަށްވުރެ ގިނަ މައްސަލަ ވަނީ ހުށަހަޅާފައެވެ. އޭގެ ތެރެއިން ވެސް އެންމެ ގިނައީ ކުޑަކުދިންނަށް އަނިޔާކުރުމުގެ މައްސަލައެވެ. އެ ބާވަތު 84 މައްސަލައެއް މިދިޔަ މަހު ވަނީ ހުށަހަޅައިފައެވެ.
ކުޑަކުދިންނަށް ކުރާ އަނިޔާގެ މައްސަލަތަކުގައި އޮގަސްޓް މަހު އެންމެ ގިނައީ އިހުމާލުވުމުގެ މައްސަލައެވެ. އެގޮތުން އެ ބާވަތުގެ 26 މައްސަލަ ރިޕޯޓުކޮށްފައިވެއެވެ. އޭގެ ތެރޭގައި ހިމެނެނީ 11 ފިރިހެން ކުދިންގެ މައްސަލައަކާއި 15 އަންހެން ކުދިންގެ މައްސަލައެވެ.
ތަފާސްހިސާބުތަކުން ދައްކާ ގޮތުގައި ދެވަނައަށް އެންމެ ގިނައިން ރިޕޯޓުކޮށްފައިވާ މައްސަލައަކީ ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ މައްސަލައެވެ. އެގޮތުން އެ ބާވަތުވެ 14 މައްސަލައެއް އޮގަސްޓު މަހު ރިޕޯޓްކޮށްފައިވެއެވެ. އޭގެ ތެރޭގައި ހިމެނެނީ ފިރިހެން ކުދިންނާއި ގުޅޭ ނުވަ މައްސަލައަކާއި އަންހެން ކުދިންނާއި ގުޅޭ ފަސް މައްސަލައެވެ.
އޭގެ އިތުރުން ޖިންސީ ހާނިއްކައިގެ 13 މައްސަލަ، ނަފްސާނީ ހާނިއްކައިގެ ނުވަ މައްސަލަ، ޖިސްމާނީ ހާނިއްކައިގެ އަށް މައްސަލަ، އެހެން ކުދިންގެ ފަރާތުން ގަނާ ލިބުމުގެ ފަސް މައްސަލަ، ބިރުދެއްކުމުގެ ގޮތުން ކުރެވޭ ކަންކަން – ބްލެކްމެއިލް ކުރުމުގެ ހަތަރު މައްސަލަ، ފުރައްސާރައިގެ ޝިކާރައަކަށްވުމުގެ ދެ މައްސަލަ، އެހެން ކުދިންގެ ފަރާތުން އިންޓަނެޓް މެދުވެރިކޮށް ގަނާ ލިބުމުގެ އެއް މައްސަލަ، ކުދިން ދޫކޮށްލާފައި ދިޔުމުގެ އެއް މައްސަލަ އަދި ކުދިން ނަހަމަ ގޮތުގައި ބޭނުންކުރުމުގެ އެއް މައްސަލަ ހިމެނޭ ކަމަށް ވެސް އެ ވުޒާރާއިން ވިދާޅުވެއެވެ.
ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ މައްސަލަތަކާއި ގުޅިގެން އޮގަސްޓު މަހު އެންމެ ގިނައިން ރިޕޯޓުކޮށްފައިވަނީ އަންހެން ކުދިންނާއި ގުޅުންހުރި މައްސަލައް ކަމަށާއި އޭގެ ތެރޭގައި ހިމެނެނީ، އަންހެން ކުދިންގެ 44 މައްސަލައަކާއި ފިރިހެން ކުދިންގެ 40 މައްސަލަ ކަމަށް އެ ވުޒާރާއިން ވިދާޅުވެއެވެ.
ކިޔުންތެރިންގެ ހިޔާލު