ރައްޔިތުންގެ މަޖިލީހުގެ މި ދައުރުގެ މުއްދަތު އިތުރުކުރުމަށް މަޖިލީހުން ފާސްކޮށްފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ ހުށަހެޅުއްވި ހުށަހެޅުމަކަށް، މަޖިލީހުގެ ދައުރު އޮގަސްޓް މަހުގެ 21 ވަނަ ދުވަހުގެ ނިޔަލަށް އިތުރުކުރުމަށް ވަނީ ފާސްކޮށްފައެވެ. މި ހުށަހެޅުމަށް ނެގުނު ވޯޓުގައި 59 މެންބަރުން ފެންނަ ކަމަށް ވޯޓު ދެއްވާފައިވާއިރު، 10 މެންބަރުން ނުފެންނަ ކަމަށް ވޯޓު ދެއްވިއެވެ.
ދައުރުގެ މުއްދަތު އިތުރުކުރަން ޖެހުނު ސަބަބާ ގުޅޭގޮތުން މަޖިލީހުގެ ރައީސް އަބްދުއްރަހީމް ވިދާޅުވީ، މި ދައުރުގައި މަޖިލީހުން ނިންމަން ޖެހޭ މުހިންމު މަސައްކަތްތަކެއް ހުރުމުންނެވެ. އެމަނިކުފާނު އިތުރަށް ވިދާޅުވި ގޮތުގައި، މި ދައުރު އިތުރުކުރަނީ އަވަސްއަރުވާލައިގެން ބިލުތައް ފާސްކުރުމަށް ނޫނެވެ. އޭގެ ބަދަލުގައި މި ފިޔަވަޅު އަޅަނީ އާންމު ރައްޔިތުންނަށް ފަސޭހަކޮށްދިނުމުގެ މަޤްޞަދުގައެވެ.
މީގެ އިތުރުން، މަޖިލީހުގެ ރައީސް ފާހަގަކުރެއްވި ގޮތުގައި، ދައުރު އިތުރުކުރުމުގެ އަނެއް މަޤްޞަދަކީ މެންބަރުން ދޮޅު މަސްދުވަހުގެ ޗުއްޓީއަކަށް ވަޑައިގަންނަވާ މުއްދަތުގައި އާންމުންނާ ގުޅުންހުރި ކަންކަމަށް ހުއްޓުމެއް އައިޔަ ނުދިނުމެވެ. އަދި ޤާނޫނަކީ އިންސާނުން އެކުލަވާލާ އެއްޗެއްކަމަށް ވިދާޅުވެ، ހާލަތާއި ޒަމާނާ އެއްގޮތަށް ޤާނޫނުތައް އަބަދުވެސް އިޞްލާޙުކުރަން ޖެހޭކަންވެސް އެމަނިކުފާނު ފާހަގަކުރެއްވިއެވެ.
މަޖިލީހުގެ ގަވާއިދުގައިވާ ގޮތުން، މި ހިނގަމުންދާ ދެވަނަ ދައުރު ނިމުމަށް ކަނޑައެޅިފައިވަނީ އޮގަސްޓް 15 ގައެވެ. ނަމަވެސް މި ނިންމުމާ އެކު، ދައުރު ނިމޭ ތާރީޚު ވަނީ އޮގަސްޓް 21 އަށް ބަދަލުވެފައެވެ.
ކިޔުންތެރިންގެ ހިޔާލު