މިއަހަރުގެ ޖުލައި މަހު ދިވެހިރާއްޖެއަށް ޒިޔާރަތްކުރި ފަތުރުވެރިންގެ އަދަދު، ފާއިތުވި އަހަރާ އަޅާބަލާއިރު 11.5 އިންސައްތައިގެ ކުރިއެރުމެއް ދައްކުވައިދޭކަމަށް ފަތުރުވެރިކަމާބެހޭ ވުޒާރާއިން ހާމަކޮށްފިއެވެ.
މިނިސްޓްރީ އޮފް ޓޫރިޒަމްގެ ތަފާސްހިސާބުތަކުން ދައްކާގޮތުގައި، 2023 ވަނަ އަހަރުގެ ޖުލައި މަހު ރާއްޖެއަށް 186،738 ފަތުރުވެރިން ޒިޔާރަތްކޮށްފައިވެއެވެ. މިއީ 2022 ވަނަ އަހަރުގެ އެއް މުއްދަތުގައި ރާއްޖެއަށް ޒިޔާރަތްކުރި 167،528 ފަތުރުވެރިންނާ އަޅާބަލާއިރު މަތިވެރި ކުރިއެރުމެކެވެ.
2023 ވަނަ އަހަރުގެ ފުރަތަމަ ހަތް މަސްދުވަހުގެ ތެރޭގައި ގައި ރާއްޖެއަށް ޖުމްލަ 1،308،582 ފަތުރުވެރިން ޒިޔާރަތްކޮށްފައިވާކަމަށް ވުޒާރާއިން ފާހަގަކޮށްފައިވެއެވެ. މިއީ 2022 ވަނަ އަހަރާ އަޅާބަލާއިރު 9.5 އިންސައްތައިގެ އިތުރުވުމެކެވެ. މި ފަތުރުވެރިންގެ ތެރެއިން 73.1 އިންސައްތަ ކަމުގައިވާ 932،504 ފަތުރުވެރިން އެމީހުންގެ ޗުއްޓީ ހޭދަކޮށްފައިވަނީ ރިސޯޓުތަކުގައެވެ.
ފަތުރުވެރިކަމުގެ ދާއިރާއިން ދައުލަތަށް ލިބޭ އާމްދަނީއަށް ނަޒަރު ހިންގާލާއިރު، 2023 ވަނަ އަހަރުގެ ޖުލައި މަހުގެ 17 ވަނަ ދުވަހުގެ ނިޔަލަށް ގްރީން ޓެކްސްގެ ގޮތުގައި 1.1 ބިލިއަން ރުފިޔާ ލިބިފައިވާކަން ފާހަގަކުރެވެއެވެ. މިއީ 2022 ވަނަ އަހަރުގެ އެއް މުއްދަތުގައި ލިބުނު 587 މިލިއަން ރުފިޔާއަށްވުރެ 563.4 މިލިއަން ރުފިޔާގެ ފާހަގަކުރެވޭ އިތުރުވުމެކެވެ.
ފަތުރުވެރިން ބޭނުންކުރާ ތަންތަނުގެ ތަފްޞީލަށް ބަލާއިރު، ގެސްޓްހައުސްތަކުގައި 22.1 އިންސައްތަ ކަމުގައިވާ 281،669 ފަތުރުވެރިން ޗުއްޓީ ހޭދަކޮށްފައިވާއިރު، ހޮޓާތަކުގައި 34،306 ފަތުރުވެރިންނާއި، ސަފާރީ އުޅަނދުތަކުގައި 26،869 ފަތުރުވެރިން ހޭދަކޮށްފައިވެއެވެ. މީގެ އިތުރުން، އެހެނިހެން ތަންތަނުގައި 894 ފަތުރުވެރިން ޗުއްޓީ ހޭދަކޮށްފައިވާކަން ފާހަގަކުރެވެއެވެ.
މި ވަގުތު ދިވެހިރާއްޖޭގައި ފަތުރުވެރިކަމުގެ ޚިދުމަތް ފޯރުކޮށްދެމުން ގެންދަނީ 175 ރިސޯޓާއި، 886 ގެސްޓްހައުސްގެ އިތުރުން 159 ސަފާރީ އުޅަނދާއި 16 ހޮޓަލުންކަން ވުޒާރާގެ ތަފާސްހިސާބުތަކުން ދައްކައެވެ.
ކިޔުންތެރިންގެ ހިޔާލު