ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު މިލަދުންމަޑުލު ދެކުނުބުރީ މާޅެންދުއަށް ވަޑައިގެންފިއެވެ.
މިއީ ނ. އަތޮޅަށް ކުރައްވާ ރަސްމީ ދަތުރުފުޅުގެ ތެރެއިން މިއަދު ވަޑައިގަންނަވާ ދެވަނަ ރަށެވެ.
ރައީސުލްޖުމްހޫރިއްޔާ މާޅެންދުއަށް ވަޑައިގެންނެވުމުން ރަށުގެ ގިނަ ރައްޔިތުންތަކެއް މަރުޙަބާ ދެންނެވުމަށް ބަނދަރު ސަރަހައްދަށް އެއްވެފައިވެއެވެ. މި ދަތުރުފުޅުގައި ރައީސް މުޢިއްޒު ރަށުގެ އެކި ފަރާތްތަކާ ބައްދަލުކުރައްވާނެ ކަމަށް ރިޔާސީ ކޮމިއުނިކޭޝަންސް އޮފީހުން މަޢުލޫމާތު ދީފައިވެއެވެ.
މި ގޮތުން ރަށު ކައުންސިލާއި މުއައްސަސާތަކުގެ އިސްވެރިންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރެއްވުމަށް ވަނީ ހަމަޖެހިފައެވެ. މީގެ އިތުރުން ރަށުގެ ރައްޔިތުންނާވެސް ބައްދަލުކުރައްވާނެއެވެ.
ރައީސް މުޢިއްޒުގެ މި ދަތުރުފުޅުގެ އެންމެ މުހިންމު އެއް ކަމަކީ މާޅެންދޫގައި އިމާރާތްކުރާ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އެޅުމުގެ ރަސްމިއްޔާތެވެ. މި މަޝްރޫޢަކީ ރަށުގެ ޒުވާނުންނަށް އަމާޒުކޮށްގެން ކުރިއަށް ގެންދާ މުހިންމު މަޝްރޫޢެކެވެ.
މި މަހުގެ 21 އިން 24 އަށް ކުރިއަށްދާ މި ދަތުރުފުޅުގައި ރައީސުލްޖުމްހޫރިއްޔާ ނ. އަތޮޅުގެ މީހުން ދިރިއުޅޭ 13 ރަށަށް ވަޑައިގަންނަވާނެއެވެ. މި ދަތުރުފުޅުގެ މައިގަނޑު މަޤްޞަދަކީ ރަށްރަށުގެ ތަރައްޤީގެ މަޝްރޫޢުތައް ބައްލަވާލެއްވުމާއި، ރައްޔިތުންގެ ކަންބޮޑުވުންތަކާއި ޝަކުވާތައް އަޑުއެއްސެވުމެވެ.
ކިޔުންތެރިންގެ ހިޔާލު