ސްޓޭޓް ފާމަސިއުޓިކަލް އެންޑް މެޑިކަލް ސަޕްލައި ކޯޕަރޭޝަން (ސްޓޭޓްފާމާ) އިން މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އާއި އެކު ފާމަސީގެ ދާއިރާއިން ދށް ތަމްރީނު ކުރުމުގެ ފުރުސަތު ފުޅާކުރުމަށް މަޝްވަރާތައް ފަށައިފި އެވެ.
ސްޓޭޓްފާމާގެ އިސް އޮފިޝަލުން އެމްއެންޔޫގެ ފެކަލްޓީ އޮފް ހެލްތު ސައިންސަސްގެ މަންދޫބުންނާ ބައްދަލުކޮށް ފާމަސީގެ ދާއިރާއިން ތަމްރީނު ލިބިފައިވާ ފާމަސިސްޓުންގެ އަދަދު އިތުރުކޮށް، ގައުމުގެ ބޭސްވެރިކަމުގެ ވަޒީފާ ހަރުދަނާ ކުރެވޭނެ ގޮތްތަކާ ގުޅޭގޮތުން މަޝްވަރާކޮށްފައިވެ އެވެ.
މި ބައްދަލުވުމަށްފަހު ސްޓޭޓްފާމާއިން ބުނީ ޕްރޮފެޝަނަލް ހުނަރު އިތުރުކުރުމަށް މިހާރު އެ ދާއިރާގައި މަސައްކަތްކުރާ ފާމަސިސްޓުންނަށް ރިފްރެޝަރ ޓްރެއިނިން ޕްރޮގްރާމްތައް ހިންގުމަށް ވެސް ދެ ފަރާތުން އެއްބަސްވެފައިވާ ކަމަށެވެ.
މި މަޝްވަރާތައް ކުރިއަށް ގެންގޮސްފައިވަނީ ސްޓޭޓްފާމާއިން މިދިޔަ މަހު 30 އަށް ވުރެ ގިނަ ފާމަސިސްޓުން ހޯދުމަށް މަސައްކަތް ކުރަމުންދާކަން އިއުލާން ކުރުމުން، އެ މުއްދަތުގައި އެ ދާއިރާއިން ތަމްރީނު ލިބިފައިވާ ދިވެހިން މަދުކަން ފާހަގަވުމުން ކަމަށް އެކުންފުނިން ބުނެފައިވެ އެވެ.
ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން ކުރިން ހިންގަމުން އައި ފާމަސީތަކުގެ ޒިންމާއާ ސްޓޭޓްފާމާއިން ހަވާލުވީ މި މަހުގެ 8 ވަނަ ދުވަހު އެވެ.
ކިޔުންތެރިންގެ ހިޔާލު