ކުރިއަށް އޮތް 1447 ވަނަ އަހަރުގެ އަޟްޙާ ޢީދު ނަމާދު މާލެ ސިޓީގައި ބޮޑު ޖަމާޢަތުގައާއި މިސްކިތްތަކުގައި ކުރުމަށް ހަމަޖެހިފައިވާ ތަންތަން އިސްލާމިކް މިނިސްޓްރީން މިއަދު އިޢުލާނުކޮށްފިއެވެ.
މިނިސްޓްރީން ކުރި އިއުލާނުގައި ބުނެފައިވާގޮތުން، މާލެއާއި ވިލިމާލެ އަދި ހުޅުމާލެ ހިމެނޭހެން ގިނަ އަދަދެއްގެ މިސްކިތްތަކާއި މައިދާންތަކެއްގައި ޢީދު ނަމާދު ކުރުމަށް ވަނީ ހަމަޖެހިފައެވެ.
މިފަހަރުވެސް ޢީދު ނަމާދު ކުރަން ފަށާ ގަޑިއަކީ އެދުވަހުގެ ހެނދުނު 7:00 އެވެ.
މާލެ ސިޓީގައި ޢީދު ނަމާދު ކުރުމަށް ހަމަޖެހިފައިވާ މައިދާންތަކަކީ:
މާފަންނު ސްޓޭޑިއަމް (މާލެ ބޮޑުޖަމާޢަތް)
ވިލިމާލެ ބޯޅަދަނޑު (ވިލިމާލެ ބޮޑުޖަމާޢަތް)
ހުޅުމާލެ ފޭސް 1 ސިންތެޓިކް ޓްރެކް (ހުޅުމާލެ ބޮޑުޖަމާޢަތް)
ހުޅުމާލެ ފޭސް 2 ގެ ހުސްބިން (މަސްޖިދު ޙަސަން އާދަމް ކައިރި)
މައިދާންތަކުގެ އިތުރުން މާލޭގެ އިސްލާމީ މަރުކަޒާއި، ސަލްމާން މިސްކިތް ހިމެނޭހެން މާލޭގެ 16 މިސްކިތެއްގައި ޢީދު ނަމާދު ކުރާނެއެވެ.
މީގެ ތެރޭގައި މަސްޖިދުލްފުރުޤާން، މަސްޖިދުއްނޫރު، އަދި ޖަލާލުއްދީން މިސްކިތް ފަދަ ބޮޑެތި މިސްކިތްތައް ހިމެނެއެވެ.
ވިލިމާލޭގައި މަސްޖިދުއްސަލާމްގައި ޢީދު ނަމާދު ކުރާއިރު، ހުޅުމާލެ ފޭސް 1 އަދި ފޭސް 2 ގެ ޖުމްލަ 7 މިސްކިތެއްގައި ޢީދު ނަމާދުގެ ޖަމާޢަތް ބޭއްވުމަށް ވަނީ ނިންމާފައެވެ.
އިސްލާމިކް މިނިސްޓްރީން އިތުރަށް ބުނީ، މޫސުން ގޯސްވެ ވިއްސާރަވުމުގެ ސަބަބުން މައިދާންތަކުގައި ބާއްވާ ބޮޑު ޖަމާޢަތްތައް ކެންސަލް ކުރަން ޖެހިއްޖެ ހާލަތެއްގައި، މާލެ ސިޓީގައި ހުކުރު ނަމާދުކުރާ ހުރިހާ މިސްކިތެއްގައި ޢީދު ނަމާދުގެ ޖަމާޢަތް ބާއްވާނެ ކަމަށެވެ.
ކިޔުންތެރިންގެ ހިޔާލު