މީހެއްގެ ބޭންކް އެކައުންޓެއް ހެކުކޮށް ގިނަ އަދަދަކަށް ފައިސާ ނެގި މައްސަލައިގައި ބަންދުކޮށްފައިވާ، ގއ. ގެމަނަފުށި، ރަންކޮކާގެ، ނަދީފް މުޙައްމަދުގެ ބަންދަށް ލުޔެއްދީ، އޭނާ ރަށަށް ފޮނުވައިދިނުމަށް އޭނާ ކޯޓުގައި އެދެފިއެވެ.
އުމުރުން 36 އަހަރުގެ އެ މީހާ ހައްޔަރުކުރީ ވިޔަފާރިކުރާ މީހަކަށް ކަސްޓަމަރެއްގެ ގޮތުގައި ގުޅައި, އޯޓީޕީ ފޮނުވަން ބުނުމުން އޯޓީޕީ ފޮނުވި ފަހުން އެ މީހާގެ ބޭންކު އެކައުންޓުން ފައިސާ ކެނޑިފައިވާ ކަމަށް ބުނެ ފުލުހުންނަށް ހުށަހެޅި މައްސަލައެއްގެ ތަހުގީގުގެ ތެރެއިން, ކޯޓު އަމުރެއްގެ ދަށުން މިދިޔަ ޑިސެންބަރު މަހުގެ 29 ވަނަ ދުވަހެވެ.
އޭނާގެ ބަންދުގެ މުއްދަތު އެކިފަހަރު މަތިން އިތުރުކޮށްފައިވާއިރު، އެންމެ ފަހުން ބަންދަށް ޖެހީ 30 ދުވަހެވެ. އަދި އިތުރު 30 ދުވަހުގެ މުއްދަތެއް އޭނާގެ ބަންދަށް އިތުރު ކުރީ މިއަދެވެ. މިއަދު ޖެހި ބަންދުގެ މުއްދަތު ހަމަވާނީ މާރިޗު މަހުގެ 29 ވަނަ ދުވަހުއެވެ.
މިއަދުގެ ބަންދު ރިޕޯޓުގައިވާ ގޮތުން އޭނާ ވަނީ ރަށަށް ދާން ޓިކެޓު ވެސް ނަގައިފައެވެ. ޝަރުތާއެކު ދޫކޮށްލައި ދިނުމަށް އޭނާ ވަނީ ކޯޓުގައި މިއަދު އެދިފައެވެ.
ނަދީފުގެ ބަންދު ދަމަހައްޓަން ނިންމި ކަމަށް ކުރިން އާންމުކުރި ކޯޓު އަމުރުގައިވާ ގޮތުން، އެ މައްސަލައިގައި ގެއްލުންވި މީހާގެ ބަޔާނާއި، ފުލުހުންގެ ފަރާތުން ބޭންކާއެކު ކޮށްފައިވާ މުއާމަލާތްތަކާއި އޭނާގެ ހަރަކާތްތައް ފެންނަ ސްނެޕްޝޮޓުތަކާއި ދެ ހެކިވެރިއެއްގެ ބަޔާން ހުށަހަޅާފައިވެއެވެ.
މި މައްސަލައިގައި ދެން ހައްޔަރުކުރި އައްޑޫ ހިތަދޫ، ދާގަނޑުކެކުރިގެ، ޝާފިޢު ޝިހާބު، 33 އެވެ.
ފުލުހުން ކުރިން ބުނެފައިވަނީ ނަދީފް ވަނީ 29،600 އަށްވުރެ ގިނަ ފައިސާ އެހެން މީހެއް އެކައުންޓަށް ޖަމާކޮށް، އެކިފަހަރު މަތިން 24،700 ރުފިޔާ އޭޓީއެމް މެދުވެރިކޮށް ނަގާފައި ކަމަށެވެ. އަދި, 4,900 އަށްވުރެ ގިނަ ރުފިޔާ އެހެން ފަރާތެއްގެ އެކައުންޓަށް ޖަމާކުރުމަށް ފަހު އެ ފައިސާތައް ނަގާފައިވާކަން ވެސް އެނގިފައިވާ ކަމަށް ފުލުހުން ބުންޏެވެ.
މީގެ އިތުރުން, ނަދީފަކީ އެކި ފަރާތްތަކުގެ އަތުން ކޭޝްކާޑު ކުއްޔަށް ނަގައިގެން އޭޓީއޭމް މެދުވެރިކޮށް ސްކޭމްގެ ފައިސާ ނަގަމުންދާ މީހެއްކަން ތަހުގީގަށް އެނގިފައިވާ ކަމަށް ފުލުހުން ބުންޏެވެ.
އޭނާގެ މައްސަލަ އެންޓި ސްކޭމް ސެންޓަރުން އަންނަނީ ތަހުގީގު ކުރަމުންނެވެ.
ކިޔުންތެރިންގެ ހިޔާލު