ކުރިއަށް އޮތް ލޯކަލް ކައުންސިލްތަކުގެ ބައި-އިލެކްޝަނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ކުޅުދުއްފުށި ސިޓީން ވާދަކުރާ އެމްޑީޕީގެ ކެންޑިޑޭޓުންނަށް ތާއިދު ހޯއްދެވުމަށް، އެމްޑީޕީގެ ރައީސް ޢަބްދުﷲ ޝާހިދު ކުޅުދުއްފުށި ސިޓީގައި “ދޮރުން ދޮރަށް” ހަރަކާތުގައި ބައިވެރިވެ ވަޑައިގެންފިއެވެ.
މި ހަރަކާތުގެ ދަށުން އެމްޑީޕީގެ ރައީސް ޢަބްދުﷲ ޝާހިދު ވަނީ މިއަދު ކުޅުދުއްފުށީގެ ގިނަ ގޭބިސީތަކަށް ޒިޔާރަތްކުރައްވައި، ރައްޔިތުންގެ ހާލުބައްލަވައި، ކެންޑިޑޭޓުންނަށް ތާއިދު ހޯއްދެވުމަށް މަސައްކަތް ކުރައްވާފައެވެ. މި ހަރަކާތުގައި ޕާޓީގެ އިސް ބޭފުޅުންނާއި، ކުޅުދުއްފުށީގެ އެމްޑީޕީގެ ހީވާގީ މެންބަރުން ބައިވެރިވެވަޑައިގެންފައިވެއެވެ.
މި ޒިޔާރަތުގެ މައިގަނޑު ބޭނުމަކީ ކުރިއަށް އޮތް އިންތިޚާބުތަކަށް އެމްޑީޕީން ނެރެފައިވާ ކެންޑިޑޭޓުންނަކީ ރަށުގެ ތަރައްޤީއަށާއި ރައްޔިތުންގެ ލާބައަށް މަސައްކަތް ކުރާނެ ގާބިލު ބޭފުޅުންކަން ރައްޔިތުންނަށް ހާމަކޮށްދިނުމެވެ. އަދި މި ވަގުތު ރައްޔިތުންނަށް ކުރިމަތިވެފައިވާ ގޮންޖެހުންތަކާއި، ކައުންސިލް މެދުވެރިކޮށް ހައްލުކުރަން ބޭނުންވާ ކަންކަމާ ގުޅޭގޮތުން މަޝްވަރާކުރެއްވުންވެސް މި ހަރަކާތުގެ ތެރެއިން ކުރިއަށްދެއެވެ.
އެމްޑީޕީން މަޢުލޫމާތު ދޭ ގޮތުގައި، ކުޅުދުއްފުށި ސިޓީގެ އިންތިޚާބު ކާމިޔާބު ކުރުމަކީ ޕާޓީން ވަރަށް ބޮޑު އިސްކަމެއްދޭ ކަމެކެވެ. ރައީސް ޝާހިދު ކުޅުދުއްފުއްޓަށް ކުރައްވާ މި ދަތުރުފުޅުގައި ކެންޕެއިން ދޮރުން ދޮރުގެ އިތުރުން ރޭ ވަނީ ބޮޑު ޖަލްސާއެއްވެސް ބާއްވާފައެވެ.
ކުޅުދުއްފުށި ސިޓީއަކީ އަބަދުވެސް ސިޔާސީ ގޮތުން ފޯރިގަދަ އަދި އެމްޑީޕީއަށް ބޮޑު ތާއިދެއް އޮންނަ ސިޓީއަކަށްވާއިރު، މި ފަހަރުގެ އިލެކްޝަންތަކުން ކާމިޔާބު ހޯދުމަށް ޕާޓީން އަންނަނީ ވަރުގަދައަށް ތައްޔާރުވަމުންނެވެ.
ކިޔުންތެރިންގެ ހިޔާލު