އިސްލާމް މާއްދާ އިނގިރޭސި ބަހުން ކިޔަވައިދިނުމަކީ މައްސަލައެއް ނޫން ކަމަށް މިނިސްޓަރު ޝަހީމް ވިދާޅުވެއްޖެއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް މިއަދު ވިދާޅުވެފައިވަނީ، ސްކޫލްތަކުގައި އިސްލާމް މާއްދާ ދަރިވަރުންނަށް ފަހުމްވަނީ އިނގިރޭސި ބަހުން ކިޔަވައިދީގެން ކަމަށް ވާނަމަ، އެގޮތަށް ކިޔަވައި ދިނުމަކީ މައްސަލައެއް ނޫން ކަމަށެވެ. މީގެ އިތުރުން އިސްލާމް މުގައްރަރު ޒަމާނަށް ފެތޭ ގޮތަށް އަދި މި ޒަމާނުގެ ޖީލަށް ވިސްނޭނެ ގޮތަށް ފަސޭހަ އިބާރާތަކުން އަލުން ލިޔަން ޖެހޭ ކަމަށް ވެސް އޭނާ ވަނީ ފާހަގަކުރައްވާފައެވެ. މި ވާހަކަފުޅު ޝަހީމް ދެއްކެވީ “މިހާރު” ނޫހުގައި މިއަދު ޝާއިއުކުރި ރިޕޯޓެއް ޝެއާ ކުރައްވައި، ސޯޝަލް މީޑިއާގައި ކުރެއްވި ޕޯސްޓެއްގައެވެ.
މިނިސްޓަރު ޝަހީމްގެ ޕޯސްޓުގައި ބަޔާންކުރައްވާފައިވާ ގޮތުގައި، އިސްލާމް މާއްދާ ދަރިވަރުންނަށް ފަހުމްވަނީ އިނގިރޭސި ބަހުންނަމަ، އެ ބަހުން ކިޔަވައިދިނުމަކީ އެއްވެސް މައްސަލައެއް އޮތް ކަމެއް ކަމަކަށް އޭނާ ދެކެވަޑައިނުގަންނަވައެވެ. މި ހިޔާލަކީ، ދަރިވަރުންނަށް ދީނީ ތައުލީމު ފަސޭހައިން ލިބިގަތުމަށް މަގުފަހިކުރުމުގެ މަގްސަދުގައި ދެއްކެވި ވާހަކަފުޅެއްގެ ގޮތުގައި ބެލެވެއެވެ.
އިސްލާމް މުގައްރަރަށް ބަދަލުތައް ގެނައުމުގެ މުހިއްމުކަމަށް އަލިއަޅުވާލައްވަމުން، ޝަހީމް ވިދާޅުވީ، މުގައްރަރު ޒަމާނަށް ފެތޭ ގޮތަށް އަދި މިހާރުގެ ޖީލަށް ވިސްނޭނެ ފަދަ ފަސޭހަ އިބާރާތްތަކުން އަލުން ލިޔަން ޖެހޭ ކަމަށެވެ. މީގެ އިތުރުން، ފޮތުގެ ވައްޓަފާޅި އާއި ލޭއައުޓަށް ވެސް ބަދަލުތައް ގެނައުމުގެ މުހިއްމުކަން އޭނާ ފާހަގަކުރެއްވިއެވެ. ގްރޭޑްތަކާއި އުމުރުފުރާތަކާ ގުޅޭ ގޮތަށް މުގައްރަރުގައި ހިމެނޭ މުހިއްމު ބައިތައް އަލުން ތަރައްގީކޮށް، އެއް ފޮތެއްގައި ހިމެނޭ އެކި ދާއިރާތަކުގެ މައުޟޫތައް ވަކި މަރުހަލާތަކަށް ބަހާލުން ރަނގަޅު ކަމަށް ވެސް މިނިސްޓަރު ވިދާޅުވިއެވެ.
ދިވެހި ބަހުގެ ކުރިއެރުމާ ބެހޭ ގޮތުން ޝަހީމް ވިދާޅުވީ، ވަކި މާއްދާއެއްގެ ގޮތުގައި ދިވެހި ބަސް ކިޔަވައިދިނުމުން ދިވެހި ބަސް ކުރިއަރާނެ ކަމަށެވެ. ނަމަވެސް، ދިވެހި ބަސް އެންމެ ބޭނުންވާ މިންވަރަށް ކުރިއަރުވަން ބޭނުންވާނަމަ، ތައުލީމީ ނިޒާމު އެއްކޮށް ދިވެހި ބަހަށް ބަދަލުކުރަން ޖެހޭނެ ކަމަށާއި، އެހެންނަމަވެސް އެއީ ރާއްޖެއަށް އެންމެ ފައިދާހުރި ގޮތަށް ނުވެދާނެ ކަމަށް ވެސް އޭނާ ފާހަގަކުރެއްވިއެވެ.
މިނިސްޓަރު ޝަހީމްގެ މި ޕޯސްޓަކީ އޭނާގެ އަމިއްލަ ހިޔާލެއް ކަމަށް ވެސް އޭނާ ވަނީ ފާހަގަކުރައްވާފައެވެ. ‘މިހާރު’ ނޫހުގެ ރިޕޯޓަށް ދީފައިވާ ބައެއް އިސްލާމް ޓީޗަރުންގެ ހިޔާލުތަކުން އެ މާއްދާ އިނގިރޭސި ބަހުން ކިޔަވައިދިނުމަށް ތާއިދުކުރާ ކަން ހާމަވެފައިވެއެވެ. ނަމަވެސް، މިކަމާ ދެކޮޅު ބައެއް ބޭފުޅުން ގަބޫލުކުރައްވާ ގޮތުގައި، އިސްލާމް މާއްދާ އިނގިރޭސި ބަހުން ކިޔަވައިދީފިނަމަ ދިވެހި ބަހަށް އޮތް އިހުތިރާމް ކުޑަވެގެންދާނެއެވެ.
ކިޔުންތެރިންގެ ހިޔާލު