ގޯލްޑަން ފުޓްސެލް ޗެލެންޖް 2026 ގެ ލާމު އަތޮޅު ބުރުގެ ފޯރިގަދަ ސެމީ ފައިނަލްގައި 6 – 0 ކުން ލ. މުންޑޫ ބަލިކޮށް، ލ. އިސްދޫ މުބާރާތުގެ ފައިނަލުން ޖާގަ ކަށަވަރުކޮށްފިއެވެ.
މި ފޯރިގަދަ މެޗު ފެށިގެން ދިޔައީ ދެ ޓީމުގެ ފަރާތުންވެސް ވަރަށް ވާދަވެރި ކުޅުމަކާއެކުގައެވެ. ސެމީ ފައިނަލަށް ދެ ޓީމުންވެސް ވަރަށް ފުރިހަމައަށް ތައްޔާރުވެފައިވާކަން މެޗުގެ ކުރީކޮޅު ފެނިގެންދިޔައިރު، ދެ ޓީމުންވެސް ދިޔައީ ނުރައްކާތެރި ހަމަލާތަކެއް އުފައްދަމުންނެވެ.
މެޗުގެ ފުރަތަމަ ލަނޑު ޖަހައި ކުރިހޯދީ އިސްދޫ ޓީމުންނެވެ. މި ލަނޑު އެޓީމަށް ކާމިޔާބުކޮށްދިނީ މެދުދަނޑާ ހިސާބުން ފޮނުވާލި ހޫނު ހަމަލާއަކުން ލޫތު އަހުމަދު ފަތުހީއެވެ. މި ލަނޑަށްފަހު އިސްދޫގެ ކުޅުން އިތުރަށް ވަރުގަދަކޮށް، މާގިނަ އިރުތަކެއް ނުވެ އެޓީމުގެ އަލީ ހުމޭޒު ވަނީ ދެވަނަ ލަނޑެއް ޖަހައި ލީޑު ފުޅާކޮށްދީފައެވެ. ފުރަތަމަ ހާފު ނިމުނީ ދެ ޓީމުންވެސް އިތުރު ލަނޑެއް ޖެހުމަށް ގިނަ މަސައްކަތްތަކެއް ކުރަމުން ދަނިކޮށް 2-0 ގެ ނަތީޖާއަކުން އިސްދޫ ކުރީގައި އޮވެގެންނެވެ.
ދެވަނަ ހާފު ފެށިގެން މާގިނަ އިރުތަކެއް ނުވެ، އިސްދޫއަށް ލިބުނު ކޯނަރެއްގެ ބޭނުން ހިފާ އަލީ މީސާގު އީސާ ވަނީ އެޓީމުގެ ތިންވަނަ ލަނޑު ކާމިޔާބުކޮށްދީފައެވެ. އޭގެ ކުޑަ އިރުކޮޅެއް ފަހުން މެދުދަނޑު ކައިރިން ލިބުނު ހިލޭ ޖެހުމަކުން ލޫތު އަހުމަދު ފަތުހީ ވަނީ އޭނާގެ ދެވަނަ ލަނޑު ޖަހައި، އިސްދޫގެ ލީޑު ހަތަރު ލަނޑަށް ބަދަލުކޮށްލާފައެވެ.
އިސްދޫގެ ފަސްވަނަ ލަނޑު، ލިބުނު ހުސް ފުރުސަތެއްގެ ބޭނުން ހިފާ ހޫދު އަހުމަދު ފަތުހީ ކާމިޔާބުކޮށްދިންއިރު، މެޗުގެ އެންމެ ފަހު މިނެޓުގައި އެޓީމުގެ ހަވަނަ ލަނޑު ޖަހައިދިނީ މުހައްމަދު ޝިރުފާން ރަޝީދެވެ. މުޅި މެޗުގައި މޮޅު ކުޅުމެއް ދެއްކި އިސްދޫ ޓީމުގެ ލޫތު އަހުމަދު ފަތުހީ ވަނީ މި މެޗުގެ މޭން އޮފް ދަ މެޗުގެ މަގާމު ހޯދާފައެވެ.
ލާމު އަތޮޅުގެ ފައިނަލްގައި ބައްދަލުކުރާނީ އެ އަތޮޅުގެ ފުޓްސެލްގެ އެންމެ ބޮޑު ދެ ބާރު ކަމަށްވާ ލ. އިސްދޫ އާއި ލ. ގަމެވެ. މިއީ މިދިޔަ އަހަރުގެ ގޯލްޑަން ފުޓްސެލް ޗެލެންޖުގެ ލާމު އަތޮޅު ފައިނަލްގައިވެސް ބައްދަލުކުރި ދެ ޓީމެވެ. މި މެޗު ވެގެންދާނީ ދެ ރަށުގެ ސަޕޯޓަރުންގެ މެދުގައި ވަރަށް ފޯރިގަދަ ކުރިމަތިލުމަކަށެވެ.
ކިޔުންތެރިންގެ ހިޔާލު