ގައުމީ ބޮޑު ދެ އިންތިހާބު ކަމަށްވާ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަކީ ބޮޑު ގޯހެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޔާމީން މިހެން ވިދާޅުވެފައި މިވަނީ ދެ އިންތިހާބު އެއްކޮށްލުމަށާއި އެކަމަށް ދައުރު ފެއްތުމުގެ ގޮތުން މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ ދައުރު ކުރުކޮށްލަން ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ހުށަހަޅާފައި ވަނިކޮށެވެ.
ޕީއެންއެފްގެ ފްރޮންޓް އޮފީސް ޖަލްސާގައި ރޭ ވާހަކަ ދައްކަވަމުން ރައީސް ޔާމީން ވިދާޅުވީ ގާނޫނުއަސާސީގައި ބުނާ ގޮތުން ރައީސުލްޖުމްހޫރިއްޔާއާއި ރައްޔިތުންގެ މަޖިލީހަކީ މުޅިން ވަކިކުރެވިފައިވާ އަދި މުޅިން ދެ މަސައްކަތެއް ކުރާ ދެ ބާރެއް ކަމަށެވެ.
ރައީސުލްޖުމްހޫރިއްޔާގެ މައިގަނޑު މަސައްކަތަކީ ސަރުކާރު ހިންގުން ކަމަށްވާއިރު މަޖިލީހުގެ މައިގަނޑު މަސައްކަތަކީ ގާނޫނުތައް ހެދުމާއެކު ސަރުކާރު ޖަވާބުދާރީކުރުވުން ކަމަށްވާތީ މި ދެ ބާރުގެ އިންތިހާބުގައި އެކުގައި ބާއްވަންޖެހޭ ސަބަބެއް ނެތް ކަމަށް އެމަނިކުފާނު ގަބޫލުކުރައްވަ އެވެ.
ރައީސް ޔާމީން އިތުރަށް ވިދާޅުވީ ބޮޑު ދެ އިންތިހާބުކޮށްލަނީ ހަރަދު ކުޑަކުރަން ކަމަށް ސަރުކާރުން ބުނާ ކަމަށެވެ. އެކަމަކު އެ ބަދަލާ އެކު ރައްޔިތުންނަށް ލިބިގެންވާ ހައްގެއް އަދި ބޮޑު މަސްލަހަތެއް ގެއްލިގެންދާ ކަމަށެވެ.
މީގެ ކުރިން، ކުރީގެ ރައީސް މުހައްމަދު ނަޝީދު ވަނީ ދެ އިންތިހާބު އެއްކޮށްލައި، އެކީގައި ބޭއްވުމަކީ ރަނގަޅު ގޮތެއް ކަމަށް ދެކެވަޑައިގަންނަވާ ކަމަށް ވިދާޅުވެފަ އެވެ. ނަަމަވެސް، ނަޝީދު ވެސް ނިސްބަތްވާ އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވަނީ، ސަރުކާރުން ގެންނަ ބަދަލާ ގުޅޭ ގޮތުން ވިސްނައި ފިކުރުކުރަން ޖެހޭ ކަމަށް ވިދާޅުވެފަ އެވެ.
ކިޔުންތެރިންގެ ހިޔާލު