އައު އަހަރާ ދިމާކޮށް ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) އިން ކުންފުނި ރީބްރޭންޑްކޮށްފިއެވެ. މި ރީބްރޭންޑިންގގެ ތެރެއިން ކުންފުނީގެ އައު ލޯގޯއެއް ތަޢާރަފުކޮށްފައިވާއިރު، މި ލޯގޯ ފަރުމާކޮށްފައިވަނީ ދިވެހިންގެ ތަރިކައިގެ މުހިންމު ބައެއްކަމުގައިވާ ފަންވިޔުން އަސްލަކަށް ބަލައިގެންނެވެ.
އާރް.ޑީ.ސީގެ ސޯޝަލް މީޑިއާ އެކައުންޓުން ޙިއްޞާކޮށްފައިވާ ވީޑިއޯއަކުން ކުންފުނީގެ ލޯގޯ ބަދަލުވިކަން ޢާންމުކޮށްފައިވެއެވެ. މި ބަދަލާއެކު ކުންފުނީގެ ބްރޭންޑް އައިޑެންޓިޓީ އައު ސިފައެއްގައި ޙިއްޞާކޮށްފައިވާއިރު، ކުންފުނީގެ މިޝަންވެސް އިތުރަށް ފުރިހަމަކޮށްފައިވާކަން ފާހަގަކުރެވެއެވެ.
އާރް.ޑީ.ސީގެ އައު ލޯގޯ ފަރުމާކުރުމުގައި ދިވެހިންގެ އަތްތެރި މަސައްކަތުގެ ތެރެއިން ފަންވިޔުން އަސްލަކަށް ބަލައިގެން ފަރުމާކޮށްފައިވާކަން ފާހަގަކުރެވެއެވެ. ފަންވިޔުމަކީ ދިވެހިންގެ އާދަކާދައިގެ ތެރޭގައި ޒަމާންވީ އަތްތެރި މަސައްކަތެއްގެ ގޮތުގައި ބެލެވޭ، ފަން ބޭނުންކޮށްގެން ތަފާތު ޒީނަތްތެރި ކުލަތަކުގައި ވިޔާ ތަފާތު ތަކެތި ފަރުމާކުރުމުގެ ހުނަރެވެ.
ރޯޑް ޑިވެލޮޕްމަންޓް ކޯޕަރޭޝަން (އާރް.ޑީ.ސީ) އަކީ ރާއްޖޭގެ މަގުތައް ތަރައްޤީކުރުމާއި، ސިވިލް އިންފްރާސްޓްރަކްޗަރ ބިނާކުރުމުގެ މަސައްކަތްކުރާ ސަރުކާރުގެ ކުންފުންޏެކެވެ. ކުންފުނި އުފެދުނީ 2001 ވަނަ އަހަރުއެވެ. އޭގެފަހުން ކުންފުނިން ވަނީ ރާއްޖޭގެ އެކި ކަންކޮޅުތަކުގައި ގިނަ މަގުތަކެއް ހަދައި، ބްރިޖްތަކާއި ކޯޒްވޭތައް ބިނާކޮށް، ރާއްޖޭގެ އިންފްރާސްޓްރަކްޗަރ ތަރައްޤީކުރުމުގައި މުހިންމު ދައުރެއް އަދާކޮށްފައެވެ.
ކިޔުންތެރިންގެ ހިޔާލު