މާލެ ސަރަހައްދު ހިމެނޭހެން، ރާއްޖޭގެ ބޮޑު ބަޔަކަށް ވައިގަދަވާނެ ކަމަށް ލަފާކޮށް ނެރެމުން އަންނަ ރީނދޫ ސަމާލު އަނެއްކާ ވެސް މިއަދު ދަންމާލައިފިއެވެ.
މާލެ، ވިލިމާލެ، ހުޅުމާލެ ހިމެނޭހެން ރާއްޖޭގެ ބޮޑު ސަރަހައްދަކަށް ގަދަ ވަޔާއެކު ވިއްސާރަ ކުރަމުން އަންނަތާ މިހާރު ދުވަސްކޮޅެއްވެއްޖެއެވެ. އެކަމަކު، މިއީ މި ވިއްސާރައިގެ ތެރޭގައި މިހާ ބޮޑަށް ވައިގަދަވީ ފުރަތަމަ ފަހަރެވެ. އަދި މިއީ މި ސަމާލު ދަންމާލާފައި އޮންނަތާ ވެސް މިހާ ގިނައިރުވީ ފަހަރެވެ.
މޫސުމާ ބެހޭ ގައުމީ އިދާރާ (މެޓް) އޮފީހުން ދަނީ ރެއިން ފެށިގެން އެ ސަރަހައްދަށް ރީނދޫ ސަމާލު ނެރެމުންނެވެ.
ރީނދޫ ސަމާލު އެންމެ ފަހުން ނެރުނީ މިއަދު 9 ޖަހާކަން ހާއިރެވެ. އެ ސަމާލު ނެރުނީ ފަތިހު 9:30 އިން މިއަދު ހެނދުނު 13:30 އަށެވެ. ރީނދޫ ސަމާލުގައި ވަނީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާ ކުރެވޭ ކަމަށެވެ.
މިއީ އާންމުކޮށް ވައި ޖެހޭ މިންވަރަށް ވުރެ ބާރުމިނެކެވެ. މެޓުން ވިދާޅުވީ ވިލާގަނޑުގައި ގަޑިއަކު 50 މޭލަށް ވައިގަދަވެ، ކަނޑުތައް ގަދަވާނެ ކަމަށް ވެސް ލަފާ ކުރެވޭ ކަމަށެވެ.
ރީނދޫ ސަމާލު ނެރުނީ މާލެ ސަރަހައްދުގެ އިތުރުން ހއ. އަތޮޅުން ފެށިގެން ތ. އަތޮޅާ ހަމައަށެވެ.
މެޓް އޮފީހުން ރޭއާއި ދަންވަރު ވަނީ މެދުރާއްޖެ ތެރޭގެ ބޮޑު ސަރަހައްދަކަށް ރީނދޫ ސަމާލު ނެރެފައެވެ.
Alert Yellow for strong winds of 25 – 30 mph and gusts of 50 mph with very rough seas. pic.twitter.com/jX978uDDDe
— Maldives Meteorology (@MetMaldives) October 23, 2025
މި ދުވަސްވަރަކީ މޫސުން ގޯސް ދުވަސްވަރެއް ކަމުން، ހުރިހާ ފަރާތްތަކުން ވެސް މޫސުމަށް ސަމާލުވުމަށް ކަމާބެހޭ ފަރާތްތަކުން ދަނީ އިރުޝާދު ދެމުންނެވެ. ހާއްސަކޮށް، ކަނޑުދަތުރުކުރާ ފަރާތްތަކުން މޫސުމާ ގުޅޭ އެންމެ ފަހުގެ މައުލޫމާތު ހޯދައިގެން ދަތުރު ކުރުމަށް ދަނީ އިރުޝާދު ދެމުންނެވެ.
މި ފަހުން މާލެ އިން ފުރައިގެން ކ. އެރިޔަދޫ އަށް ދަތުރު ކުރި ކޮޅުވެއްޓިއެއް ބަންޑުން ޖަހާލައި އޭގައި ތިބި ތިން މީހަކު ވަނީ ނިޔާވެފައެވެ. މި ތިން މީހުންގެ ތެރޭގައި ދިވެއްސަކު ވެސް ހިމެނެއެވެ. އޭގެ ފަހުން، މުދާ އުފުލާ ބޮޑު ބޯޓެއް ވެސް ދިޔަވެ، އަޑިއަށް ގޮސްފައިވެއެވެ.
ކިޔުންތެރިންގެ ހިޔާލު