ރޭގައި ބަންޑުން ޖަހާލި ކޮޅުވެއްޓިން ގެއްލުނު ތިން މީހުންގެ ތެރެއިން އެކަކު މަރުވެފައި އޮއްވައި ފެނިއްޖެ އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ ގެއްލިގެން ހޯދަމުންދިޔަ ތިން މީހުންގެ ތެރެއިން އެކަކުގެ ހަށިގަނޑު ފެނުނީ މިއަދު ހެނދުނު ކަމަށެވެ.
“ހަތް މީހުންނާއެކު ދަތުރު ކުރަމުން ދަނިކޮށް އޮކްޓޫބަރު 15، 2025 ވަނަ ދުވަހުގެ ރޭ ދަންވަރު ބަންޑުން ޖަހާލި “އަލްމާކް ފިޔަ” ނަމަކަށް ކިޔާ ލޭންޑިން ކްރާފްޓުން ގެއްލިގެން ހޯދަމުންދިޔަ ތިން މީހުންގެ ތެރެއިން އެކަކު ވަނީ ކޯސްޓު ގާޑު ޑައިވަރުން ޓީމަށް ނިޔާވެފައި އޮއްވައި ފެނިފައި،” އެމްއެންޑީއެފުން ފޮނުވި މެސެޖުގައި ބުންޏެވެ.
މަރުވެފައި އޮއްވައި ފެނުނު މީހާގެ ވަނަވަރެއް ފުލުހުން ހާމައެއް ނުކުރެ އެވެ. ފުލުހުން ބުނީ އެ މައްސަލަ އިތުރަށް ތަހުގީގު ކުރަމުންދާ ކަމަށެވެ.
މެރިން ޕޮލިސްއިން ފޭސްބުކްގައި ލިޔެފައިވާ ޕޯސްޓެއްގައި ބުނީ ކޮޅުވެއްޓި ބަންޑުން ޖަހާލީ ރޭ މެންދަމު 3:48 ހާއިރު އާއިލާފުށި ރިސޯޓާ އެއް މޭލު ބޭރަށް ކަމަށެވެ.
އެ އުޅަނދުން ގެއްލުނު ތިން މީހުންގެ ތެރެއިން ދެ މީހަކު ތިބީ އޭގައި އޮތް އެކްސްކެވޭޓަރެއްގެ ތެރޭގައި ކަމަށް މައުލޫމާތު ލިބިފައިވާ ކަމަށް ވެސް މެރިން ޕޮލިހުން ބުނެފައިވެ އެވެ.
ގެއްލުނު ތިން މީހުން ހޯދުމުގެ މަސައްކަތް ކޯސްޓުގާޑާއި ފުލުހުން ގުޅިގެން ކުރަމުންދާ ކަމަށް މެރިން ޕޮލިސްއިން ބުންޏެވެ.
ކިޔުންތެރިންގެ ހިޔާލު