މި އަހަރުގެ ފުރަތަމަ ނުވަ މަސް ދުވަހުގެ ތެރޭގައި ދައުލަތަށް ޓެކްސް އާމްދަނީގެ ގޮތުގައި 20 ބިލިއަން ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިއަދު ހާމަކޮށްފިއެވެ. މި އަދަދަކީ މިދިޔަ އަހަރުގެ މި މުއްދަތާ އަޅާ ބަލާއިރު، ދެ ބިލިއަން ރުފިޔާގެ ބޮޑު ކުރިއެރުމެކެވެ.
މީރާއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، މިދިޔަ އަހަރުގެ ފުރަތަމަ ނުވަ މަސް ދުވަހު ޓެކްސްގެ ގޮތުގައި ދައުލަތަށް ލިބިފައިވަނީ 18 ބިލިއަން ރުފިޔާއެވެ. ޓެކްސް އާމްދަނީ މިހާ ބޮޑަށް އިތުރުވުމުގެ މައިގަނޑު ސަބަބުތަކުގެ ތެރޭގައި، ދައުލަތަށް އާމްދަނީ ލިބޭ ބައެއް މުހިންމު ޓެކްސްތަކަށް ގެނެވުނު ބަދަލުތަކާއި، އެ ތަކެތީގެ އަދަދު ބޮޑުކުރުން ހިމެނެއެވެ. އެގޮތުން، ގްރީން ޓެކްސް، ޑިޕާޗާ ޓެކްސް، އެއާޕޯޓު ޑިވެލޮޕްމެންޓް ފީ އަދި ޓޫރިސްޓު ގަވަރމެންޓް ސަރވިސް ޓެކްސް (ޓީޖީއެސްޓީ) އިން ލިބުނު އާމްދަނީ ވަނީ ފާހަގަކުރެވޭ މިންވަރަކަށް އިތުރުވެފައެވެ.
ޓެކްސްގެ ބާވަތްތަކަށް ވަކިވަކީން ބަލާއިރު، މި އަހަރުގެ މިހާތަނަށް ޑިޕާޗާ ޓެކްސްގެ ގޮތުގައި 1.4 ބިލިއަން ރުފިޔާ ލިބިފައިވާއިރު، މިދިޔަ އަހަރުގެ އެ މުއްދަތުގައި ދައުލަތަށް ލިބިފައިވަނީ 869 މިލިއަން ރުފިޔާއެވެ. ގްރީން ޓެކްސްގެ ގޮތުގައި މި އަހަރު 1.7 ބިލިއަން ރުފިޔާ ލިބިފައިވާއިރު، މިދިޔަ އަހަރުގެ ނުވަ މަހު ގްރީން ޓެކްސް އިން ލިބިފައިވަނީ 808 މިލިއަން ރުފިޔާއެވެ.
އަދި، އެއާޕޯޓް ޑިވެލޮޕްމެންޓް ފީގެ ގޮތުގައި ވެސް މި އަހަރުގެ މިހާތަނަށް 1.4 ބިލިއަން ރުފިޔާ ދައުލަތަށް ލިބިފައިވެއެވެ. މިދިޔަ އަހަރުގެ މި މުއްދަތުގައި އެ އަދަދު ހުރީ 887 މިލިއަން ރުފިޔާގައެވެ.
ދައުލަތަށް ޓެކްސްގެ ގޮތުގައި އެންމެ ބޮޑު އަދަދެއް ވަންނަނީ ޓީޖީއެސްޓީން ކަމަށް މީރާއިން ފާހަގަކުރެއެވެ. މިއީ ދައުލަތަށް ވަންނަ ޖުމްލަ ޓެކްސްގެ 32 ޕަސެންޓެވެ. މި އަހަރުގެ ފުރަތަމަ ނުވަ މަހު ޓީޖީއެސްޓީގެ ގޮތުގައި 8.2 ބިލިއަން ރުފިޔާ ލިބުނެވެ. އެއީ މިދިޔަ އަހަރުގެ މި މުއްދަތަށް ވުރެ އެއް ބިލިއަން ރުފިޔާ އިތުރު އަދަދެކެވެ.
މީރާއިން ހާމަކުރި ގޮތުގައި، މިދިޔަ ސެޕްޓެމްބަރު މަހު އެކަނި ވެސް ޓެކްސް އާއި އެހެން ފީތަކާ އެކު ދައުލަތަށް ތިން ބިލިއަން ރުފިޔާ ވަދެފައިވެއެވެ. އެއީ މިދިޔަ އަހަރުގެ ސެޕްޓެމްބަރު މަހާ އަޅާ ބަލާއިރު 31 އިންސައްތަ އިތުރުވުމެކެވެ.
ދައުލަތަށް ޓެކްސްގެ ގޮތުގައި ލިބޭ އާމްދަނީގެ 79 އިންސައްތަ ލިބެނީ ޑޮލަރުންނެވެ. މި އަހަރުގެ ފުރަތަމަ ނުވަ މަހު ޑޮލަރުން 851 މިލިއަން ޑޮލަރު މީރާއަށް ލިބިފައިވެއެވެ.
ކިޔުންތެރިންގެ ހިޔާލު