ތ. ވޭމަންޑޫ މަގު ހެދުމުގެ މަޝްރޫއު ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ.
މަގު ހެދުމުގެ މަޝްރޫއު އާރްޑީސީއާ ހަވާލުކުރީ ރައީސް ޑރ. މުހައްމަދު މުއިއްޒު، ތ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި، ރޭ އެ ރަށު ރައްޔިތުންނާ ބައްދަލު ކުރެއްވުމަށް ބޭއްވި ޖަލްސާގައެވެ.
ވޭމަންޑޫ މަގުހެދުމުގެ އެއްބަސްވުމުގައި އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. އަބްދުﷲ މުއްތަލިބެވެ. އާރްޑީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހީމް ނަޒީމްއެވެ.
ރޭގެ ޖަލްސާގައި މި މަޝްރޫއުއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ އެ އެއްބަސްވުމަކީ މުހިންމު އެއްބަސްވުމެއް ކަމަށެވެ. އަދި މަގުތައް ވަރަށް ބޮޑަށް ހަލާކުވެ، ޖިސްމާނީ ގޮތުން ވެސް ރައްޔިތުންނަށް ގެއްލުންވަމުންދާ ކަމަށް ރައީސް ވިދާޅުވިއެވެ. އެގޮތުން އެ ރަށުގައި ފުރިހަކަމާއެކު މަގު ހެދުމުގެ މަޝްރޫއު އަވަސް ސްޕީޑުގައި ކުރިއަށް ގެންދަވާނެ ކަމަށް ވިދާޅުވިއެވެ.
ރައީސް ޑރ މުހައްމަދު މުއިއްޒުގެ ސަރުކާރުން ދަނީ ރައްޔިތުންގެ ގާތަށް ޒިޔާރަތްކޮށް ރައްޔިތުންގެ ހުރި ކަންބޮޑުވުންތައް އަޑުއައްސަވާ އެކަންކަމަށް ހައްލު ހޯދުމަށް މަސައްކަތް ފަށާފައެވެ. އެގޮތުން ރާއްޖޭގެ އެކި ކަންކޮޅުތަކަށް ދަތުރުކޮށް ރަށުގައި ހުރި އެކިއެކި ކަންބޮޑުވުންތަކަށް ހައްލު ހޯދުމަށް ދަނީ މަސައްކަތްތަކެއް ކޮށްދެއްވަމުންނެވެ.
ކިޔުންތެރިންގެ ހިޔާލު