އައިފޯން ސީރީޒްގެ 17 ވަނަ ޖީލު އަންނަ ސެޕްޓެމްބަރުގައި ތަޢާރަފުކުރުމަށް ހަމަޖެހިފައިވެއެވެ. މި ސީރީޒްގެ އައު އިތުރުވުމެއްގެ ގޮތުގައި “އައިފޯން 17 އެއަރ” ވެސް ސެޕްޓެމްބަރުގައި އާންމު ވިޔަފާރިއަށް ނެރުމަށް ރޭވިފައިވެއެވެ.
އެޕަލްގެ އައިފޯން 17 އެއަރ އަމާޒުކުރެވިފައިވަނީ އުފެއްދުންތެރި، ޒަމާނީ އަދި ވާދަވެރި ޖީލަކަށެވެ. މިއީ ވާދަވެރި ބްރޭންޑްތަކާ ވާދަކުރުމަށް އެޕަލުން ތަޢާރަފުކުރާ އުފެއްދުމެކެވެ.
ރިޕޯޓުތަކުގައި ފާހަގަކުރެވިފައިވާ ގޮތުގައި އައިފޯން 17 ސީރީޒްގައި ހިމެނެނީ އައިފޯން 17، އައިފޯން 17 އެއަރ، އައިފޯން 17 ޕްރޯ އަދި އައިފޯން 17 ޕްރޯ މެކްސްއެވެ.
ޚަބަރުތަކުގައި ބަޔާންކޮށްފައިވާ ގޮތުގައި އައިފޯން 17 ސީރީޒްގައި އައިފޯން 17 ޕްލަސް ހިމެނިފައެއް ނުވެއެވެ. މިއަށް ސަބަބެއްކަމަށް ބެލެވެނީ މި މޮޑެލްގެ އެއްވެސް ޖީލެއް އެކަށީގެންވާ މިންވަރަކަށް ވިއްކިފައިނުވުމެވެ.
އައިފޯން 17 ސީރީޒްގެ ފޯނުތައް، ކުރީގެ އަހަރުތަކުގައި ނެރެފައިވާ އައިފޯންތަކާ އަޅާބަލާއިރު މާބޮޑު ތަފާތެއް ނުހުންނާނެކަމަށް ލަފާކުރެވެއެވެ. ނަމަވެސް، އައިފޯން 17 އެއަރގެ ޑިޒައިނާއި ސޮފްޓްވެއަރ އިންޓަފޭސްގައި ފާހަގަކުރެވޭ ބަދަލުތަކެއް ގެނެވިފައިވާނެކަމަށް ބެލެވެއެވެ.
އައިފޯން 17 އެއަރ އަކީ ޚާއްޞަ ގޮތެއްގައި ތުނި އަދި އަތުގައި ގެންގުޅުމަށް ފަސޭހަ ފޯނަކަށް ވާނެކަމަށް ލަފާކުރެވެއެވެ. މި ފަސޭހަކަން ހޯދުމަށްޓަކައި، ބެޓެރީގެ ޙަޖަމު ކުޑަކުރެވިފައިވެއެވެ. މީގެ މާނައަކީ މި ބްރޭންޑްގެ އެހެނިހެން ފޯނުތަކާ އަޅާބަލާއިރު އައިފޯން 17 އެއަރ އަވަސްއަވަހަށް ޗާޖުކުރަން ޖެހިދާނެކަމެވެ.
އައިފޯން 17 އެއަރގެ ސްކްރީން ސައިޒަކީ 6.6 އިންޗިއެވެ. މިއީ 120 ހާޓްޒްގެ ޕްރޮމޯޝަން ރޭޓެއް ހިމެނޭ ޑިސްޕްލޭއެކެވެ. މި ފޯނަށް އެކަށޭނަ ގޮތަށް އޭ19 ޗިޕްސެޓަށްވެސް ބަދަލުތަކެއް ގެނެވިފައިވާކަމަށް ރިޕޯޓުތަކުގައި ފާހަގަކޮށްފައިވެއެވެ. ޗާޖުކުރުމަށް ބޭނުންކުރެވޭނީ ޓައިޕް-ސީ ޕޯޓެކެވެ.
ކިޔުންތެރިންގެ ހިޔާލު