އަންނަ އަހަރު ބާއްވާ ލޯކަލް ކައުންސިލް އިންތިޚާބަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ތައްޔާރުވުމުގެ މަސައްކަތް ފަށައި، އެ ކެމްޕެއިނުގެ ކެމްޕެއިން މެނޭޖަރަކަށް ޕާޓީގެ ޗެއާޕާސަން ފައްޔާޒު އިސްމާއިލް ހަމަޖެހިފައިވާކަމުގެ ޙަބަރު “ހަވާސާ” ލިބިއްޖެއެވެ.
މައުލޫމާތު ލިބިފައިވާ ގޮތުގައި ފައްޔާޒު ކެމްޕެއިން މެނޭޖަރަކަށް ހަމަޖެއްސީ، ފައްޔާޒާއި ކުރީގެ ރައީސް މުޙައްމަދު ނަޝީދު އިސްވެ ހުންނަވައި، ޕާޓީގެ ގިނަ އަދަދެއްގެ މެންބަރުންނާ އެކު ރޭ ބޭއްވި ޚާއްސަ ބައްދަލުވުމަކުންނެވެ.
އޯޓީޕީ ރެސްޓޯރެންޓުގައި ބޭއްވި މި ބައްދަލުވުމަކީ، ކައުންސިލް އިންތިޚާބުގެ ކެމްޕެއިނަށް ތައްޔާރު ވުމުގެ މަސައްކަތްތައް ފެށުމަށް ބޭއްވި ބައްދަލުވުމެއްކަން ވަނީ އެނގިފައެވެ. އާންމުންނަށް ހުޅުވާނުލައި ކުރިއަށްގެންދިޔަ މި ބައްދަލުވުމުގައި 150 އާއި 200 އާ ދެމެދުގެ އަދަދަކަށް އެމްޑީޕީގެ އިސް ސަފުގައި ހަރަކާތްތެރިވާ މެންބަރުން ބައިވެރިވެފައިވެއެވެ.
2028 ވަނަ އަހަރުގެ ރިޔާސީ އިންތިޚާބަށް ޝައުޤުވެރިކަން ފާޅުކުރައްވާފައިވާ ދެ ބޭފުޅުން ކަމަށްވާ ފައްޔާޒާއި ނަޝީދު، ޕާޓީގެ ކެމްޕެއިނެއްގައި އެކުގައި މަސައްކަތްކުރައްވަން ނުކުމެވަޑައިގަތުމަކީ، އެތެރޭގެ ޚިޔާލުތަފާތުވުންތައް އެއްފަރާތްކޮށް ޕާޓީގެ މަސްލަހަތު އިސްކުރައްވާނެ ކަމުގެ ހެއްކެއްގެ ގޮތުގައި ގިނަ ބަޔަކު ދެކެއެވެ.
ކައުންސިލް އިންތިޚާބުގެ ކަންކަމުގެ އިތުރުން، މި ބައްދަލުވުމުގައި ވެރިކަން ހިންގުމުގެ ނިޒާމާއި، ޕްރިފެރެންޝަލް ވޯޓިންގ ސިސްޓަމެއް ގެންގުޅުމާ ބެހޭގޮތުން ވެސް މަޝްވަރާކޮށްފައިވެއެވެ.
ފައްޔާޒާއި ނަޝީދުގެ އިތުރުން، ކުރީގެ ރައީސް އިބްރާހިމް މުޙައްމަދު ޞާލިޙް އަދި ރައްޔިތުންގެ މަޖިލީހުގެ މެންބަރު އަޙްމަދު ޝާހިދު ވެސް ވަނީ އެމްޑީޕީގެ ރިޔާސީ ޓިކެޓަށް ވާދަކުރެއްވުމުގެ ޝައުޤުވެރިކަން ފާޅުކުރައްވާފައެވެ.
މިހާރު ގާނާގައި ދިރިއުޅުއްވަމުން ގެންދަވާ ރައީސް ނަޝީދު މާލެ ވަޑައިގެންނެވީ މިރޭގެ ބައްދަލުވުމަށް ޚާއްސަކޮށެވެ. އެމަނިކުފާނު އަލުން އެމްޑީޕީއާ ގުޅިވަޑައިގެންފައިވަނީ، ޕާޓީން ވަކިވެވަޑައިގެން ދެ އަހަރު ހުންނެވުމަށްފަހު، މިދިޔަ ޖޫން މަހުގެ 23ގައެވެ.
ކިޔުންތެރިންގެ ހިޔާލު