މިނިވަން ދުވަހުގެ ހަރަކާތްތަކުގެ ރިހާސަލްއަށް މިއަދުގެ ބައެއް ވަގުތުތަކުގައިވެސް ޖުމްހޫރީ މައިދާން ސަރަހައްދު ބަންދުވާނެކަމަށް ފުލުހުން ބުނެފިއެވެ.
ފުލުހުން މިއަދު ބުނީ މިނިވަން ދުވަހުގެ ހަރަކާތްތަކުގެ ރިހާސަލްއަށް މިއަދުގެ 16:00 އިން 18:00 އަށް އަދި މިރޭ 19:45 ފެށިގެން ރިހާސަލް ނިމެންދެން ޖޫމްހޫރީ މައިދާން ހިމެނޭ ސަރަހައްދު ބަންދުކުރުމަށް ހަމަޖެހިފައިވާ ކަމަށެވެ.
އެގޮތުން ބޮޑުތަކުރުފާނު މަގުގައި ހުންނަ ރައީސް އޮފީސް ސަރަހައްދުން ފެށިގެން އެމްއެމްއޭ ކަންމައްޗާއި ހަމައަށް ބަންދުކުރުމަށް ވަނީ ނިންމާފައި އެވެ. އަދި ޗާންދަނީ މަގުގެ ބޮޑު ސަރަހައްދެއް ބަންދުކުރާނެ ކަމަށް ފުލުހުން ވަނީ ބުނެފައި އެވެ. މީގެ އިތުރުން ޖުމްހުރީ މައިދާއި ގުޅޭ ހުރިހާ މަގެއްވެސް އެވަގުތުތަކުގައި ބަންދުވާނެއެވެ.
މިއަހަރު ފާހަގަކުރާ ރާއްޖޭގެ 60 ވަނަ މިނިވަން ދުވަހުގެ ޚާއްސަ ހަރަކާތްތަކެއް ކުރިޔަށް ގެންދިޔުމަށް ނިންމާފައިވަނީ ޖުމްހޫރީ މައިދާން ސަރަހައްދުގައި އެވެ. އެގޮތުން އެމްއެންޑީއެފްގެ އަސްކަރީ ހަރަކާތްތައް ހިމެނޭ ޕެރޭޑާއި ދިވެހިރާއްޖޭގެ ޤައުމީ ކެޑޭޓުކޯގެ ޕެރޭޑްގެ އިތުރުން ސްކޫލްތަކުގެ ކުޅިވަރު އަދި ސަގާފީ އައިޓަމްތަކާއި އެކު ޒަމާނުއްސުރެ ބާއްވަމުން އަންނަ ހެވިކަމާއި ކުޅިވަރު ހަރަކާތްތައް ކުރިޔަށް ގެންދާނީ ޖުމްހޫރީ މައިދާނުގައިއެވެ.
ކިޔުންތެރިންގެ ހިޔާލު