ފާއިތުވި ހަފުތާގެ ތެރޭގައި ސްކޭމްގެ އެކި މައްސަލަތަކުގައި ގެއްލުނު 598,467.44 އިން 255,710.99 ރުފިޔާ އަނބުރާ ހޯދިފައިވާ ކަމަށް އެންޓި ސްކޭމް ސެންޓަރުގެ ތަފާސް ހިސާބުތަކުން ދައްކައިފި އެވެ
އެންޓި ސްކޭމް ސެންޓަރުން އާންމުކޮށްފައިވާ މިމަހުގެ 17 އިން 23 ގެ ތަފާސްހިސާބުތަކަށް ބަލާއިރު، އެ މުއްދަތުގެ ތެރޭގައި ސްކޭމްގެ ޖުމްލަ 29 މައްސަލައެއް ވަނީ ރިޕޯޓްކޮށްފައެވެ.
މި މައްސަލަތަކުގައި މީހުންގެ އަތުން ޖުމްލަ 598,467.44 ގެއްލިފައިވެއެވެ. އެ ސެންޓަރުގެ ތަފާސް ހިސާބުތަކުން ދައްކާގޮތުން، ކަމާބެހޭ އިދާރާތަކާ ގުޅިގެން ކުރި މަސައްކަތުން އޭގެ ތެރެއިން 255,710.99 ރުފިޔާ ވަނީ އަނބުރާ ހޯދިފައި ކަމަށެވެ.
މިދިޔަ ހަފުތާގައި އެންމެ ގިނައިން ރިޕޯޓްކޮށްފައިވަނީ އީ-ކޮމާސް ނުވަތަ އޮންލައިން ވިޔަފާރިތަކާ ގުޅުންހުރި ސްކޭމްތަކެވެ.
އެ ބާވަތުގެ 15 މައްސަލައެއް ހުށަހެޅިފައިވާއިރު، އެފަދަ ކަންކަމުން ރައްކާތެރިވުމަށްޓަކައި ވިޔަފާރީގެ މައުލޫމާތާއި ވިއްކާ މުދާ ދިމާވޭތޯ ބެލުމަށާއި، ފިހާރަ ނުވަތަ ގުދަން ހުރިތަން ޔަގީންކުރުމަށްފަހު “ކޭޝް އޮން ޑެލިވަަރީ” (ސީއޯޑީ) ބޭނުންކުރުމަށް ކަމާބެހޭ ފަރާތްތަކުން އިލްތިމާސް ކުރެއެވެ.
ޑޮލަރު މާރުކުރުމުގެ މައްސަލަތަކުގައި ހަ މައްސަލައެއް ރިޕޯޓްކޮށްފައިވާއިރު، ޑޮލަރު ގަންނައިރު ލައިސަންސް އޮތް ތަނެއްތޯ ބެލުމުގެ އިތުރުން، ވައިބާ ނުވަތަ ވަޓްސްއަޕް މެދުވެރިކޮށް މުއާމަލާތް ކުރާއިރު އެއީ ސައްހަ ނަންބަރެއްތޯ ގުޅައިގެން ކަށަވަރުކުރުމަކީ މުހިންމު ކަމެއް ކަމަށް އެންޓި ސްކޭމް ސެންޓަރުން އިލްތިމާސްކުރެއެވެ.
އޭގެ އިތުރުން އޮޅުވާލައިގެން އެހެން މީހެއްގެ ނަމުގައި ގުޅައިގެން ފައިސާ ހޯދުމުގެ ދެ މައްސަލައެއް ރިޕޯޓްކޮށްފައިވާ ކަމަށް ތަފާސް ހިސާބުތަކުން ދައްކައެވެ. އެހެންކަމުން ސްކޭމްތަކުން ރައްކާތެރިވުމުގެ ގޮތުން، އެކި ފަރާތްތަކުން ފޮނުވާ ޝައްކުކުރެވޭ ލިންކުތަކަށް ނުފިއްތުމަށާއި، އެއްވެސް ފަރާތަކާ “އޯޓީޕީ” ހިއްސާ ނުކުރުމަށް އެ ސެންޓަރުން ތަކުރާރުކޮށް ވަނީ ހަނދާންކޮށްދީފައެވެ.
ކިޔުންތެރިންގެ ހިޔާލު