ދައުލަތަށް ދައްކަންޖެހޭ ފައިސާ ނުދެއްކި ހުރި ފައިސާ ހޯދުމަށް ކުރި މަސައްކަތުން މިދިޔަ މަހު 543 މިލިއަން ރުފިޔާ ހޯދާފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފިއެވެ.
އޭޕްރީލް މަހުގެ މާލީ ރިޕޯޓުގައި މީރާއިން ބުނީ އެ އަދަދު ހޯދާފައިވަނީ ސަރުކާރަށް ނުދައްކާ ހުރި ޓެކްސްތަކާއި އެހެނިހެން ފައިސާ އެއްކުރުމަށް އަމާޒުކޮށްގެން، މީރާއިން ހިންގި ތަންފީޒުކުރުމާއި ރިކަވަރީގެ އެކި ފިޔަވަޅުތަކުގެ ތެރެއިން ކަމަށެވެ.
އެ އިދާރާއިން ބުނީ ފައިސާ ހޯދާފައިވަނީ ނުދެއްކި ހުރި ފަރާތްތަކަށް ދޫކުރި ނޯޓިސްތަކާއި ޑިއުސް ކްލިއަރެންސް މަރުހަލާތަކާއި އިންސްޓޯލްމަންޓް އެގްރީމަންޓްތަކާއި ރިމައިންޑަރ ފޯނު ކޯލްތަކާއި އެކްޝަން ޕޮލިސީ ފިޔަވަޅުތަކުގެ ތެރެއިން ކަމަށެވެ.
މީރާއިން ފާހަގަކުރި ގޮތުގައި ރިކަވަރ ކުރި އަދަދުގެ އެންމެ ބޮޑު ބައެއް ކަމަށްވާ 372 މިލިއަން ރުފިޔާ އެއްކޮށްފައިވަނީ ފައިސާ ނުދައްކާ ފަރާތްތަކަށް ދޫކުރި ނޯޓިސްތަކުގެ ތެރެއިން ކަމަށާއި އިތުރު 96 މިލިއަން ރުފިޔާ ހޯދާފައިވަނީ ޑިއުސް ކްލިއަރެންސް މަރުހަލާތައް މެދުވެރިކޮށް ކަމަށެވެ. މީގެ އިތުރުން އިންސްޓޯލްމަންޓް އެގްރީމަންޓް މެދުވެރިކޮށް 64 މިލިއަން ރުފިޔާ، ފޯނު ކޯލް މެދުވެރިކޮށް 5 މިލިއަން ރުފިޔާ، އަދި އެކްޝަން ޕޮލިސީ ފިޔަވަޅުތަކުގެ ތެރެއިން 4 މިލިއަން ރުފިޔާ ލިބިފައިވާ ކަމަށެވެ.
މިދިޔަ މަހު އެ އޮތޯރިޓީން ވަނީ ކޯޕަރޭޓް އަދި ޕާސަނަލް އިންކަމް ޓެކްސް ނުދައްކާ 48 ފަރާތެއްގެ ނަން ވެސް އާންމުކޮށްފަ އެވެ.
ކިޔުންތެރިންގެ ހިޔާލު