އެމްޑީޕީގެ ޗެއާޕާސަން އިންތިޚާބުގައި ކުރީގެ ރައީސް މުޙައްމަދު ނަޝީދަށް ކާމިޔާބު ލިބިވަޑައިގެންފިނަމަ، އެމަނިކުފާނާ ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް ނަސީމްގެ އަރިހުގައި ތިއްބެވި ފަރާތްތައް ޕާޓީގެ ފަހަތު ސަފަށް ޖެހެންވާނެ ކަމަށް ރައީސް ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވެފައިވަނީ އެމްޑީޕީގެ ޤައުމީ މަޖިލީހުގެ މެންބަރުން ހިމެނޭ ވަޓްސްއެޕް ގުރޫޕެއްގައެވެ. މި ވާހަކަތައް ދެކެވުނު ގުރޫޕުގެ ސްކްރީންޝޮޓްތަކެއް މިހާރު ވަނީ ސޯޝަލް މީޑިއާގައި ލީކުވެފައެވެ.
މިކަމާ ގުޅިގެން އެމްޑީޕީގެ ލީގަލް ޓީމުގައި މަސައްކަތް ކުރައްވާ މަހުފޫޒް ވަނީ، އެމީހުން ޖެހެންވީ ކިހާ ފަހަތަކަށްތޯ ސުވާލު ކުރައްވާފައެވެ. އެ ސުވާލަށް ޖަވާބު ދެއްވަމުން ނަޝީދު ވިދާޅުވެފައިވަނީ، އިންތިޚާބު ކާމިޔާބުކުރާ ފަޅީގެ މީހުން ފަހަތަށް ނުޖެއްސޭނެ ކަމަށާއި، މަހުފޫޒުވެސް ނަޝީދުގެ ކޮޅަށް ނާރައިފިނަމަ ހުންނަން ރަނގަޅުވާނީ ފަހަތުގައި ކަމަށެވެ.
ރައީސް ނަޝީދުގެ މި ވާހަކަތަކާ ގުޅިގެން ގިނަ ބައެއްގެ ފާޑުކިޔުން އެމަނިކުފާނަށް ވަނީ އަމާޒުވެފައެވެ. ގިނަ ބަޔަކު ބުނަމުންދަނީ މިއީ ރައީސް ނަޝީދުގެ އަމިއްލަ އެދުމާއި ވެރިކަމަށް ފެންބޮވައިގެންފައިވާ މިންވަރު ހާމަވާ ކަމެއް ކަމަށެވެ. އަދި ދުވަހެއް ދުވަހަކަށް އެމަނިކުފާނުގެ ކިބައިން މިފަދަ އަމަލުތައް ފެންނަމުންދާ ކަމަށްވެސް ސޯޝަލް މީޑިއާގައި ޚިޔާލުފާޅުކުރި ބައެއް ފަރާތްތަކުން ބުނެފައިވެއެވެ.
މި އިންތިޚާބަކީ އެމްޑީޕީގެ އެތެރޭގެ ފޯރިގަދަވެފައިވާ ދަނޑިވަޅެއްގައި ބޭއްވޭ އިންތިޚާބަކަށް ވާއިރު، ޕާޓީގެ ލީޑަރޝިޕްގެ ތެރޭގައި އޮތް ބަހުގެ ހަމަލާތައް މިވަނީ ވަރަށް ބޮޑަށް އިތުރުވެފައެވެ.
ކިޔުންތެރިންގެ ހިޔާލު