ވ. އަތޮޅުގެ ކަނޑުއަޑީގެ ހޮހަޅައަކަށް ފީނަން ގޮސް އުޅެނިކޮށް ގެއްލުނު އިޓަލީގެ ހަތަރު ޑައިވަރުންގެ ހަށިގަނޑު، އެމީހުން ފީނި ހޮހަޅައިގެ ތެރެއިން މިއަދު ފެނިއްޖެއެވެ.
އެމްއެންޑީއެފުން މިއަދު ”އެކްސް“ ގައި ކުރި ޕޯސްޓެއްގައި ބުނީ، މިދިޔަ ބުރާސްފަތި ދުވަހު ޑައިވިނަށް ގޮސް އުޅެނިކޮށް ގެއްލުނު މި ހަތަރު ފަތުރުވެރިން ހޯދުމަށް ހިންގި އޮޕަރޭޝަނުގައި، އެމީހުންގެ ހަށިގަނޑުތައް މިހާރު ލޮކޭޓް ކުރެވިފައިވާ ކަމަށެވެ. މި އޮޕަރޭޝަނަކީ އެމްއެންޑީއެފް ކޯސްޓްގާޑާއި، ދިވެހި ފުލުހުންގެ އިތުރުން އިޓަލީ ސަރުކާރުން ފޮނުވި ތަޖުރިބާކާރު ޑައިވަރުން ގުޅިގެން ކުރިއަށް ގެންދިޔަ ހާއްސަ ހަރަކާތެކެވެ.
އެމްއެންޑީއެފުން އިތުރަށް ހާމަކޮށްފައިވާ ގޮތުގައި، މި ހަތަރު މީހުންގެ ހަށިގަނޑު ފެނިފައިވަނީ އެމީހުން ޑައިވްކުރި ހޮހަޅައިގެ ތެރެއިންނެވެ. އަދި ކުރިއަށް އޮތް ޑައިވްތަކުގައި އެމީހުންގެ ހަށިގަނޑުތައް ހޮހަޅައިން ބޭރަށް ނެރުމުގެ މަސައްކަތް ކުރުމަށް މިހާރު ވަނީ ރާވާފައެވެ.
މިކަމާ ގުޅޭގޮތުން ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާން މުހައްމަދު ހުސެއިން ޝަރީފް (މުންދު) ވިދާޅުވީ، ހަށިގަނޑުތައް ހޯދިފައިވަނީ ފުން ކަނޑުތަކަށް ފީނުމަށް ހާއްސަ ތަމްރީނު ލިބިފައިވާ ޑައިވަރުންގެ ޓީމަކުން ކުރި ބުރަ މަސައްކަތުން ކަމަށެވެ. އަދި ކުރިއަށް އޮތް ދުވަސްތަކުގައި ހަށިގަނޑުތައް މައްޗަށް ނެގުމުގެ އޮޕަރޭޝަން މެދުކެނޑުމެއް ނެތި ކުރިއަށްދާނެ ކަމަށްވެސް އޭނާ ވިދާޅުވިއެވެ.
މި ހިތާމަވެރި ހާދިސާގެ ތެރެއިން، ގެއްލުނު މީހުން ހޯދުމުގެ އޮޕަރޭޝަންގައި އުޅެނިކޮށް މިދިޔަ ހޮނިހިރު ދުވަހު އެމްއެންޑީއެފް ކޯސްޓްގާޑުގެ އެންމެ ތަޖުރިބާކާރު އެއް ޑައިވަރު ކަމަށްވާ ސްޓާފް ސާޖަންޓް މުހައްމަދު މަހުދީ ވަނީ ނިޔާވެފައެވެ. މަހުދީގެ ވަކިވުމާ ގުޅިގެން މެދުކަނޑާލި މި އޮޕަރޭޝަން އަލުން ފަށާފައިވަނީ މިއަދު ހެނދުނެވެ.
ކިޔުންތެރިންގެ ހިޔާލު