ކައުންސިލެއް ނެތް ހދ. ހިރިމަރަދޫ ރައްޔިތުންނަށް ބޭނުންވާ ހުރިހާ ހިދުމަތްތަކެއް ދެން ފޯރުކޮށްދޭނީ އެ އަތޮޅު ހަނިމާދޫ ކައުންސިލުން ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން މިއަދު ބުނެފިއެވެ. އާބާދީ ކުޑަވުމުގެ ސަބަބުން ސަރުކާރުން ވަނީ ހިރިމަރަދޫ މީހުން ހަނިމާދުއަށް ބަދަލުކުރަން ނިންމާފައެވެ.
އެލްޖީއޭގެ އޮފިޝަލަކު ވިދާޅުވީ ހިރިމަރަދޫ ކައުންސިލްގައި މިވަގުތު ތިބޭނީ ހަމައެކަނި އިދާރީ މުވައްޒަފުން ކަމަށާއި، ނަމަވެސް އެ މުވައްޒަފުންނާއި ރައްޔިތުންނަށް ބޭނުންވާ ހުރިހާ ހިދުމަތެއް ހަނިމާދޫ ކައުންސިލުން ލިބޭނެ ކަމަށެވެ. “ދަތި ކަމެއް ނެތި، ކުރިން ވެސް ލިބުނު ގޮތަށް ހުރިހާ ހިދުމަތެއް ލިބޭނެ،” އޮފިޝަލް ވިދާޅުވިއެވެ.
ހިރިމަރަދޫ މީހުންނަށް ބޭނުންވާ ހައުސިން ޔުނިޓްތަކާއި މުނިސިޕަލް ހިދުމަތްތައް ދޮޅު އަހަރު ތެރޭގައި ހަނިމާދޫގައި ގާއިމްކުރުމަށް އެޗްޑީސީއާ ވަނީ ހަވާލުކޮށްފައެވެ. މި ބަދަލާ ގުޅިގެން މިފަހަރުގެ ކައުންސިލް އިންތިހާބުގައި ހިރިމަރަދުއަށް ކައުންސިލަރުން އިންތިހާބުކޮށްފައެއް ނުވެއެވެ. އޭގެ ބަދަލުގައި އެ ރަށު މީހުން ވޯޓުލާފައިވަނީ ހަނިމާދޫ ކައުންސިލަރުން ހޮވުމަށެވެ.
ކިޔުންތެރިންގެ ހިޔާލު