ބިންވެރިޔާ ސްކީމްގެ ދަށުން ގުޅިފަޅުން ގޯތި ލިބުނު މީހުންނަށް ރަޖިސްޓްރީ ދޫކުރަން މިއަދު ފަށައިފިއެވެ.
ހައުސިން މިނިސްޓްރީން މިއަދު ބުނިގޮތުގައި ގުޅިފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، ގުރުއަތު ނެގުމަށްފަހު ގޯތި ލިބިފައިވާ ފަރާތްތަކަށް މިއަދު ރަޖިސްޓްރީ ދޫކުރަން ފަށާފައިވާ ކަމަށެވެ.
ރަޖިސްޓްރީ ދޫކުރުމުގެ މަސައްކަތް ކުރިއަށްދަނީ އެ މިނިސްޓްރީ ކުރިން ހިންގި އިމާރާތް ބިމުގައެވެ.
މި ސަރުކާރުން ގުޅިފަޅުގެ ލޭންޑް ޔޫސް ޕްލޭނަށް މިހާތަނަށް ދެފަހަރު މަތިންވަނީ ބަދަލު ގެނެސްފަ އެވެ. އެ ބަދަލުތަކާ ގުޅިގެން، މޭ މަހުގައި އެ ސަރަހައްދުން ގޯތި ލިބޭ ފަރާތްތައް ކަނޑައެޅުމަށް އަލުން ގުރުއަތުލުން ވަނީ ބާއްވައިފައެވެ.
އެ ބަދަލުތަކާ ގުޅިގެން، ކުރިން ދޫކޮށްފައިވާ ރަޖިސްޓްރީތަކާއި ގޯތީގެ އެއްބަސްވުންތައް ބާތިލުވެފައިވާތީ، ގޯތި ލިބުނު ފަރާތްތަކާއެކު އަލުން އެއްބަސްވުން ހެދުމަށް ހައުސިން މިނިސްޓްރީން ވަނީ ނިންމައިފައެވެ.
ހައުސިން މިނިސްޓްރީން ހާމަކުރި ގޮތުގައި، ކުރީގެ އެއްބަސްވުންތައް މުޅިން އުވާނުލާ، ހަމައެކަނި ގޯތީގެ ލޮޓް ނަންބަރުތަކަށް ގެންނަންޖެހޭ ބަދަލުތައް ގެނެސް، އެ އިސްލާހުތަކުގައި ސޮއިކުރުމަށް ވަނީ ހަމަޖެހިފައެވެ.
ގުޅިފަޅުގެ ލޭންޑް ޔޫސް ޕްލޭނަށް މިހާރު ގެނެސްފައިވާ އެންމެ ބޮޑު ބަދަލަކީ ހިއްކަން ހަމަޖެހިފައިވާ ފުންތަނުން ދޭން ނިންމާފައިވާ ގޯގިތައް މިހާރު ހިއްކައި ނިމިފައިވާ ސަރަހައްދުން ދޭން ނިންމައި ގެނައި ބަދަލެވެ.
ކިޔުންތެރިންގެ ހިޔާލު