ދިވެހި ގައުމު ދެކެ ލޯބިވާ ކޮންމެ މީހެއްގެ ހިތުގައި އެންމެ ފަހުރުވެރި މަގާމު އޮންނަން ވާނީ ދިވެހި ސިފައިންނަށް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ދިވެހި ސިފައިންގެ 134 ވަނަ އަހަރީ ދުވަހުގެ މުނާސަބަތުގައި، ކަޅުތުއްކަލާކޮށީގައި ރޭ ބޭއްވި ރަސްމީ ޖަލްސާގައި ރައީސް މުއިއްޒު ވިދާޅުވީ، ރާއްޖެ މިނިވަންކަމާއެކު މިއަދާއި ހަމަޔަށް ގެނެސްދީފައި ވަނީ ދިވެހި ސިފައިންގެ ހިތްވަރާއި ޖިހާދުން ކަމަށާއި އެ ސަބަބަށްޓަކައި ދިވެހި ގައުމު ދެކެ ލޯބިވާ ކޮންމެ މީހެއްގެ ހިތުގައި އެންމެ ފަހުރުވެރި މަގާމު އޮންނަން ވާނީ ދިވެހި ސިފައިންނަށް ކަމަށެވެ.
ރައީސް ވިދާޅުވީ، ސިފައިންނަކީ އަމިއްލަ ނަފުސަށްވުރެ ގައުމު އިސްކޮށްގެން މަސައްކަތްކުރާ ބަޔަކަށްވާއިރު ސިފައިންގެ ލާބައާއި ކުރިއެރުމަށް ކަންކަން ކުރުން މުހިންމު ކަމަށެވެ.
“ސިފައިންގެ ހިދުމަތުގައި ތެދުވެރިކަމާއި އިހުލާސްތެރިކަމާއެކީގައި ހިދުމަތް ކުރަމުންދާ ސިފައިންގެ މީހުންނަށް އަދި ރޭންކުގައި ވަކި މުއްދަތެއްވިޔަސް އަދި ލިމިޓޭޝަން މިހާރު އޮތް ގަވާއިދުގެ ތެރެއިން ހަމަވާގޮތަށް އޮތްއޮތުން އެއީ ބަދަލުވާން ޖެހޭ ކަމެއް ކަމަށް އަޅުގަނޑު ގަބޫލުކުރަން. އިރާދަކުރެއްވިއްޔާ އެގޮތަށް ބަދަލުކޮށްދީ ސިފައިންގެ ހިދުމަތްކުރުމުގައި ދެމި ހުރެވޭނެ ގޮތް އިރާދަކުރެއްވިއްޔާ ހަދަން ގަސްތުކުރަން. އެގޮތަށް ބަދަލުކޮށްދޭނަން،” ރައީސް ވިދާޅުވިއެވެ.
ރައީސް ވިދާޅުވީ، ސިފައިންނަށް ބޯހިޔާވަހިކަން ކަށަވަރުކޮށްދިނުމަށް ބަނޑޭރި ކޮށި ސަރަހައްދުގައި ޒަމާނީ ހައުސިން މަޝްރޫއެއް ކުރިއަށް އޮތް 8 މަސް ދުވަހުގެ ތެރޭގައި ފަށައި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުންވެސް ސިފައިންނަށް ލިބޭ ފުރުސަތުތައް އިތުރުކޮށްދެއްވާނެ ކަމަށެވެ.
ރައީސް އިތުރަށް ވިދާޅުވީ، ސިފައިން ތަމްރީނު ވުމަށް މިހާރު ހުރި ވަސީލަތްތައް އިތުރުކޮށް ރާއްޖެއިން ބޭރުންވެސް ތަމްރީނުވުުގެ ފުރުސަތުތައް ސިފައިންނަށް އިތުރުކުރާނެ ކަމަށެވެ.
ކިޔުންތެރިންގެ ހިޔާލު