އިލެކްޝަންސް ކޮމިޝަން (އީސީ)ގެ ރައީސް މުހައްމަދު ޒާހިދު މިއަދު އެ މަގާމުން އިސްތިއުފާދެއްވައިފިއެވެ.
އޭނާ މިއަދު އިސްތިއުފާދެއްވިކަން ‘ހަވާސާ’އަށް ކަށަވަރުވެފައިވީ ނަމަވެސް އިސްތިއުފާ ދެއްވި ސަބަބެއް މިހާތަނަށް އެނގިފައެއް ނުވެއެވެ. މި ކަމާ ގުޅޭ ގޮތުން އޭނާގެ ބަހެއް ހޯދަން މަސައްކަތްކުރި ނަމަވެސް މިހާތަނަށް ފޯނަށް ޖަވާބުނުދެއްވާތީ ބަހެއް ނުލިބެއެވެ.
އެ ކޮމިޝަނަށް މެންބަރުން އައްޔަންކުރައްވަނީ ރައްޔިތުންގެ މަޖިލީހުގެ ރުހުމާ އެކު ރައީސުލްޖުމްހޫރިއްޔާއެވެ.
އީސީގެ މެންބަރުކަމަށް ޒާހިދު އައްޔަންކުރީ މިދިޔަ އަހަރުގެ ޖަނަވަރީ މަހެވެ. އޭގެ ފަހުން، އޭނާއަށް އެ ކޮމިޝަންގެ ރައީސްކަން ލިބުނީ އެ އަހަރުގެ ފެބްރުއަރީ މަހެވެ. އެކަމަކު، އީސީގެ މެންބަރުކަމުގެ ފަސް އަހަރުގެ ދައުރުގެ ބޮޑުބައެއް ބާކީ އޮއްވާ މިއަދު އިސްތިއުފާދެއްވީ ކީއްވެ ކަމެއް ނޭނގެއެވެ.
އީސީގެ ނައިބު ރައީސް އަބްދުއްރަހްމާން ސޮލާހު ރަޝީދާ ސުވާލުކުރުމުން އޭނާ ‘ހަވާސާ’އަށް ވިދާޅުވީ، އީސީގެ ރައީސް ޒާހިދު މަގާމުން އިސްތިއުފާދެއްވިކަން އެންގެވި ކަމަށެވެ. އެކަމަކު، އިސްތިއުފާދެއްވި ސަބަބެއް އޭނާއަށް ވެސް އެނގިވަޑައިނުގަންނަވާ ކަމަށް ވިދާޅުވިއެވެ.
ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު)އާ ސުވާލުކުރުމުން ވެސް ވިދާޅުވީ، އިސްތިއުފާދެއްވި ނަމަވެސް ސަބަބު އެނގިވަޑައިނުގަންނަވާ ކަމަށެވެ.
ފާހަގަކޮށްލެވޭ ގޮތުގައި މި ފަހުން އީސީއަށް ވަނީ ބޮޑެތި ތުހުމަތުތަކާއި ފާޑުކިޔުންތަކެއް އަމާޒުވެފައެވެ.
އެ ގޮތުން، ރައްޔިތުންގެ މަޖިލީހުގެ ހުސްވެފައިވާ ހިތަދޫ އުތުރު ދާއިރާގެ މެންބަރުކަމަށް ކުރިމަތިލުމުގެ މުއްދަތު މިދިޔަ ހޯމަ ދުވަހު އިތުރުކުރަން ނިންމީ ސަރުކާރުގެ ނުފޫޒުން ކަމަށް ގިނަ ބަޔަކު ތުހުމަތުކުރިއެވެ.
އެހެން އެކަންވީ، އަންނަ ޖޫން މަހުގެ ހަވަނަ ދުވަހު ބާއްވަން ހަމަޖެހިފައިވާ އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަންގައި، ޕީއެންސީގެ ޓިކެޓު ލިބިވަޑައިގެންނެވި ކުރީގެ މެންބަރު މުޙައްމަދު ސިނާން (ސިނާ)، ބައި އިލެކްޝަންގައި ވާދަ ނުކުރަން ނިންމެވުމުންނެވެ. އޭނާ ވަނީ އެ ނިންމުން އީސީއާ ވެސް ހިއްސާކޮށްފައެވެ. އަދި، ހިތަދޫ މޫލެކެޑެ ދާއިރާގެ ކައުންސިލަރު އަޙްމަދު ސަޢީދު (ސޮޑާ)އަށް އެ ޕާޓީގެ ޓިކެޓު ދޭން ޕީއެންސީން ބުދަ ދުވަހު ނިންމިއެވެ.
އެހެންވެ، އިންތިޚާބުގައި ވާދަކުރުމުގެ މުއްދަތު އީސީން އިތުރުކުރީ ޕީއެންސީގެ ނުފޫޒުން ކަމަށް ބައެއް ބޭފުޅުން ވަނީ ތުހުމަތުކުރައްވާފައެވެ. އެ ގޮތުން، މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވެސް ވަނީ އެ ފަދައިން ސުވާލުކުރައްވާފައެވެ.
މީގެ އިތުރުން، މި ފަހުން އިޖުތިމާއީ މިންގަނޑާ އެއްގޮތްވާ ގޮތަށް ސިޔާސީ ހަރަކާތް ހިންގަން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޕީއެންއެފާއި އިދިކޮޅު އެމްޑީޕީއަށް އެންގި އެންގުމާ ގުޅިގެން ވެސް އީސީއަށް ފާޑުކިޔުން އަމާޒުވިއެވެ.
ކިޔުންތެރިންގެ ހިޔާލު