އެމްޑީޕީގެ ޗެއާޕާސަންގެ މަގާމަށް ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް ނަސީމް، އެ މަގާމަށް ކުރިމަތިލުމަށް ފޯމު ހުށަހަޅުއްވައިފިއެވެ.
ޗެއާޕާސަންގެ މަގާމަށް ކުރިމަތިލެއްވުމަށް މީކާއިލް ފޯމު ހުށަހެޅުއްވީ އެމްޑީޕީ ހަރުގޭގައި ރޭ ބޭއްވި “އިތުބާރު ހަރުގެ ޖަލްސާ” ގަ އެވެ. އެ ޖަލްސާގައި މީކާއިލް ތާއީދުކުރައްވާ އެމްޑީޕީގެ ގިނަ އަދަދެއްގެ މީހުންވަނީ ބައިވެރިވެފައެވެ.
ޖަލްސާގައި ވާހަކަދައްކަވަމުން މީކާއީލް ވީދާޅުވީ އެމްޑީޕީގެ މުސްތަގުބަލަށްޓަކައި އޭނާ މި އިންތިހާބު ކާމިޔާބުކުރުން މުހިންމު ކަމަށެވެ. މީކާއިލް ވިދާޅުވީ ކުރިއަށް އޮތް ރިޔާސީ ޕްރައިމަރީ އިންސާފުވެރިކަމާއެކު ކުރިއަށް ގެންދެވޭނީ ވަކި ފަރާތަކަށް ނުޖެހޭ ޗެއާޕާސަނަކު ހުރެގެން ކަމަށެވެ.
“ޗެއާޕާސަންގެ އެންމެ އަސާސީ މަސްއޫލިޔަތު، ހުރިހާ ރިޔާސީ ކެންޑިޑޭޓުންގެ މެދުގައި އިންސާފުވެރި، ހަމަހަމަ، ނަޒާހަތްތެރި ޕްރައިމަރީއެއް ބާއްވާދޭން އޮންނަ މަސްއޫލިޔަތު، ކިހިނެއްތޯއޭ އަޅުގަނޑު ނޫން މީހަކު އަދާކުރާނީ” މީކާއިލް ވިދާޅުވިއެވެ.
އެމްޑީޕީގެ ޑޭޓާބޭސްއަކީ މެންބަރުންގެ ހައްގަކަށްވާއިރު، އެއީ ވަކި ބައެއްގެ މިލްކަކަށް ވެގެން ނުވާނެ ކަމަށާއި، ޕާޓީ ހިންގުމުގައި ދެފުށް ފެންނަ ނިޒާމެއް ގާއިމުކުރާނެކަމަށް މީކާއިލް ވިދާޅުވިއެވެ.
ޖަލްސާގައި މީކާއީލަށް ތާއީދުކުރައްވައި ވާހަކަދެއްކެވި މީހުންގެ ތެރޭގައި ކުރީގެ އެންވަޔަރުމެންޓް މިނިސްޓަރު އާމިނަތު ޝައުނާ، އެމްޑީޕީގެ ކުރީގެ ރައީސް ޑރ. އިބްރާހީމް ދީދީ، މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު އަދި މަޖިލީހުގެ ވައިކަރަދޫ ދާއިރާގެ މެންބަރު އިބްރާހީމް ޒިޔާދު (ފިއްޓޭ) ހިމެނެއެވެ.
ޖަލްސާގައި ވާހަކަދައްކަވަމުން ޝައުނާ ވިދާޅުވީ މީކާއީލަކީ ޕާޓީން އުފެއްދި ޒުވާން ލީޑަރެއް ކަމަށާއި އޭނާއަކީ ޕާޓީއަށް ބޭނުންވާ ބަދަލުގެ ރަމްޒެއް ކަމަށެވެ.
ފިއްޓޭ ވިދާޅުވީ، ރަށްރަށުގެ ޖަގަހަތައް ހިންގައި، ޕާޓީގެ އާމްދަނީ އާންމު މެންބަރުންނަށް ހިއްސާކުރެވޭނެ އިންތިޒާމެއް ހަމަޖައްސައިދޭނީ މީކާއީލް ފަދަ ޒުވާން ލީޑަރެއް ކަމަށެވެ.
ކިޔުންތެރިންގެ ހިޔާލު