ހުޅުމާލޭގައި 3000 ހައުސިން ޔުނިޓް އެޅުމުގެ މަޝްރޫޢާ ގުޅިގެން މަކަރާއި ޙީލަތުން ގިނަ ބައެއްގެ އަތުން ފައިސާ ނެގި ކަމުގެ ތުހުމަތުގައި ސީލައިފް ގްލޯބަލްގެ ޑިރެކްޓަރު އަޙްމަދު މޫސާ މުޙައްމަދު (އަންމަޓީ) ގެ މައްޗަށް ދައުލަތުން އުފުލި 42 ދައުވާ ސާބިތުނުވާ ކަމަށް ކްރިމިނަލް ކޯޓުން މިއަދު ޙުކުމްކޮށްފިއެވެ.
ކްރިމިނަލް ކޯޓުން މި ޙުކުމް އިއްވީ، އަންމަޓީގެ މައްޗަށް ދައުލަތުން އުފުލާފައިވާ ޚިޔާނާތްތެރިވުމުގެ ކުށުގެ ދައުވާތަކަކީ މަދަނީ ޠަބީޢަތުގެ ދައުވާތަކެއް ކަމަށް ކަނޑައެޅުމަށް ފަހުގައެވެ. ޙުކުމުގައި ބަޔާންކޮށްފައިވާ ގޮތުން، އަންމަޓީގެ ޢަމަލުތަކާ ގުޅިގެން ފިޔަވަޅު އަޅަންޖެހޭނީ މަދަނީ ޢަދުލުގެ ނިޒާމުގެ ތެރެއިން ކަމަށް މައްސަލަ ބެއްލެވި ފަނޑިޔާރަށް ފެނިވަޑައިގަންނަވައެވެ. މި 42 ދައުވާ ސާބިތުވި ނަމަ އޭނާގެ މައްޗަށް 65 އަހަރުގެ ޖަލު ޙުކުމެއް އައުމުގެ ފުރުޞަތު އޮތެވެ.
ނަމަވެސް ޕީޖީ އޮފީހުން ބުނީ އެ ނިންމުމާ މެދު ހިތްހަމަނުޖެހޭ ކަމަށާއި، އަންމަޓީގެ މައްޗަށް ކޮށްފައިވާ ދައުވާތަކަކީ ޤާނޫނުލްޢުޤޫބާތުގެ 215 ވަނަ މާއްދާގައި ބަޔާންކުރާ ޚިޔާނާތްތެރިވުމުގެ ކުށުގެ އުންސުރުތައް ފުރިހަމަވާ ދައުވާތަކެއް ކަމަށެވެ. ޕީޖީ އޮފީހުން ފާހަގަކުރާ ގޮތުގައި، ކްރިމިނަލް ކޯޓުން މިއީ މަދަނީ މައްސަލައެއް ކަމަށް ނިންމީ ދައުވާ ސާބިތުކުރުމަށް ހުށަހެޅި ހެކިތަކަށް އެކަށީގެންވާ މިންވަރަށް ރިޢާޔަތް ނުކޮށް، ޚިޔާނާތްތެރިވުމުގެ ކުށަށް ރަނގަޅު ނޫން މާނަކުރުމެއް ދީގެންނެވެ. އެހެންކަމުން ހައިކޯޓުގައި މި މައްސަލަ އިސްތިއުނާފުކުރުމުގެ މަސައްކަތް ޕީޖީ އޮފީހުން މިހާރު ދަނީ ކުރަމުންނެވެ.
އެޗްޑީސީ އާއި ސީލައިފް ގްލޯބަލްއާ ދެމެދު 13 މާރިޗު 2014 ގައި ސޮއިކުރި އެއްބަސްވުމުގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް ހަވާލުކުރި ނަމަވެސް، ޢަމަލީ މަސައްކަތް ފުރިހަމަ ނުކޮށް 280 އަށް ވުރެ ގިނަ މީހުންގެ އަތުން ބުކިން ފީގެ ގޮތުގައި ޖުމްލަ 14 މިލިއަނަށް ވުރެ ގިނަ ރުފިޔާ ނަގާފައިވެއެވެ. މަސައްކަތް ކުރިއަށް ނުދިއުމުން 2015 ވަނަ އަހަރުގެ ސެޕްޓެމްބަރު މަހު އެޗްޑީސީން ވަނީ އެ އެއްބަސްވުން ބާޠިލުކޮށްފައެވެ. ތަޙުޤީޤު މަރުޙަލާގައި އަންމަޓީ ސްރީލަންކާއަށް ފިލައިގެން ގޮސް އުޅެނިކޮށް، 2019 ގައި އިންޓަޕޯލް ރެޑް ނޯޓިސް ނެރެގެން ހައްޔަރުކޮށް 2021 ވަނަ އަހަރުގެ މާރިޗު މަހު ރާއްޖެ ގެނެސްފައިވެއެވެ.
ކިޔުންތެރިންގެ ހިޔާލު