މިއަދު ކުރިއަށްދާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން، ރައްޔިތުންގެ ޚިޔާލު ހޯދުމުގެ ޢާންމު ވޯޓުލުމުގެ ވަގުތު، މިއަދު ހަވީރު 5:00 އާ ހަމައަށް އިތުރުކުރުމަށް އިލެކްޝަންސް ކޮމިޝަނުން ނިންމަވައިފިއެވެ.
އިލެކްޝަންސް ކޮމިޝަނުން މިގޮތަށް ނިންމެވީ، މިއަދަކީ ވަރަށް ހޫނުގަދަ ދުވަހަކަށް ވެފައި، ވޯޓުލާ މަރުކަޒުތަކުގެ ކިއުތައް ދިގުވުމުގެ ސަބަބުން ގިނަ ބަޔަކަށް ވޯޓުލުމުގައި ދަތިތަކަކާ ކުރިމަތިލާން ޖެހިފައިވާތީއެވެ. މި ނިންމުމާއެކު، ކުރިން ހަމަޖެހިފައި އޮތް ވަގުތަށްވުރެ އިތުރު ވަގުތު ވޯޓުލާ މީހުންނަށް މިހާރު ވަނީ ލިބިފައެވެ.
އެ ކޮމިޝަނުން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، މިއަދު މެންދުރު 2:00 އާ ހަމައަށް 131,947 މީހުން ވަނީ ވޯޓުލާފައެވެ. މީގެ ތެރޭގައި ހިމެނެނީ 63,175 އަންހެނުންނާއި 68,772 ފިރިހެނުންނެވެ.
މި އިންތިޚާބުގައި ޖުމްލަ 294,876 މީހުންނަށް ވޯޓުލުމުގެ ޙައްގު ލިބިގެންވާއިރު، މެންދުރު 2 ޖެހުމާ ހަމައަށް އަދި ވޯޓު ނުލައި 162,929 މީހުން އެބަތިއްބެވެ. އެހެންކަމުން، ވޯޓުލާ މަރުކަޒުތަކުގެ ކިއުތައް ބަންދުކުރުމުގެ ކުރިން ވީހާވެސް ގިނަ ރައްޔިތުން ވޯޓުލުމުގެ ޙައްގު އަދާކުރުމަށްޓަކައި ކިއުތަކަށް އެރުމަށް އިލެކްޝަންސް ކޮމިޝަނުން ވަނީ އިލްތިމާސްކުރައްވާފައެވެ.
ކޮމިޝަނުން އިތުރަށް ވިދާޅުވީ، ހަވީރު 5:00 ޖެހުމަށްފަހު އެއްވެސް މީހަކަށް އަލުން ކިއުއަށް އެރުމުގެ ފުރުސަތު ނުދެވޭނެ ކަމަށެވެ. ނަމަވެސް، 5 ޖަހާއިރު ކިއުގައި ތިބި މީހުން ވޯޓުލާ ނިމުމުން ވޯޓުފޮށިތައް ބަންދުކުރާނެއެވެ. ވޯޓު ގުނަން ފަށާނީ ވޯޓުފޮށި ބަންދުކުރާތާ 30 މިނެޓް ފަހުންނެވެ.
މި އިންތިޚާބަށްޓަކައި ރާއްޖޭގެ އެކި ކަންކޮޅުތަކުގައި ޖުމްލަ 588 ވޯޓުފޮށި ބަހައްޓާފައިވެއެވެ. ކޮންމެ ވޯޓުލާ މަރުކަޒެއްގައި 3 ވޯޓުފޮށި ބަހައްޓާފައިވާއިރު، އެއީ ލޯކަލް ކައުންސިލް އިންތިޚާބަށާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓަށް ޚާއްޞަ ފޮށިތަކެކެވެ.
ކިޔުންތެރިންގެ ހިޔާލު