ދަތުރުވެރިންގެ ކަންބޮޑުވުންތަކާއެކު ޑޮމެސްޓިކް ޓާމިނަލް ކުރިމަތިން ޓެކްސީ ލިބޭނެ އިންތިޒާމު މިއަދުން ފެށިގެން ހަމަޖައްސާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން ބުނެފިއެވެ.
އެއާޕޯޓުގެ ޑޮމެސްޓިކް ޓާމިނަލް، ކުރީގެ އިންޓަނޭޝަނަލް ޓާމިނަލަށް ބަދަލުކޮށް އެ ސަރަހައްދުގައި އޮންނަ ޓެކްސީ ކިއު ވަނީ އުވާލާފައެވެ. އަދި އެ ސަރަހައްދުން ފަސިންޖަރުން ނެގުން މަނާކޮށްފައިވާތީ، ޑޮމެސްޓިކުން އަންނަ ފަސިންޖަރުން ދާންޖެހެނީ އިންޓަނޭޝަނަލް ޓާމިނަލްގެ އެރައިވަލްއަށެވެ.
ޓްރެފިކް ފްލޯއަށް ގެނައި އެ ބަދަލާއެކު ޓެކްސީ ހޯދުމަށް މާ ދުރަށް ހިނގަންޖެހޭތީ ދަތުރުވެރިން ވަނީ ކަންބޮޑުވުން ފާޅުކޮށްފައެވެ.
ގިނަ ދަތުރުވެރީން ވަނީ ޑޮމެސްޓިކް ޓާމިނަލް (ކުރީގެ އިންޓަނޭޝަނަލް ޓާމިނަލް)އިން ނިކުމެގެން ޓެކްސީއެއް ހޯދުމަށް ކިއުއާ ހަމައަށް ދާން ކުރަންޖެހޭ ދަތުރު ވަރަށް ބޮޑު ތަކުލީފަކަށް ވެފަވި ވާކަމަށް ބުނެފައެވެ. ކުރިން ޑޮމެސްޓިކް ޓާމިނަލުން ނިކުމެ، ފެރީތައް އޮންނަ ސަރަހައްދުން ޓެކްސީ ކިއު ފެށޭތީ ހިނގަންޖެހޭ ރާސްތާ ކުޑަކަން ދަތުރުވެރިން އޭރު ވަނީ ފާހަގަކޮށްފައެވެ.
އެހެންކަމުން ޑޮމެސްޓިކް ސަރަހައްދުން ވެސް ފަސިންޖަރުންނަށް ޓެކްސީއަށް އެރޭނެ އިންތިޒާމެއް ހަމަޖައްސައިދިނުމަށާއި، އާ ޓާމިނަލް ސަރަހައްދަށް ފަސޭހައިން ހުރަސްކުރެވޭނެ ގޮތްތަކެއް ހަމަޖައްސަން ގިނަ ބަޔަކު އޭރު އެދުނެވެ.
އެ މައްސަލައަށް ހައްލެއް ހޯދައި ދިނުމުގެ ގޮތުން އެއާޕޯޓުން ވަނީ މިއަދުން ފެށިގެން ޓްރެފިކް ފްލޯއަށް ބައެއް ބަދަލުތައް ގެނެސްފައެވެ. އެގޮތުން އެއާޕޯޓުގެ ޑޮމެސްޓިކް ޓާމިނަލް ބޭނުންކުރާ ފަސިންޖަރުންނަށް ލުއިފަސޭހަ އިންތިޒާމުތަކެއް ހަމަޖައްސައިދިނުމުގެ ގޮތުން ޑޮމެސްޓިކް ޓާމިނަލް ކުރިމަތީގައިވާ ސަރަހައްދަކީ، ފަސިންޖަރުންނަށް ޓެކްސީތަކަށް އަރާ ފޭބޭނެ ސަރަހައްދެއް ކަމުގައި އެއާޕޯޓުން ވަނީ ކަނޑައަޅާފައެވެ.
އެއާޕޯޓު ކުންފުނި އެމްއޭސީއެލްއިން ބުނީ ޑޮމެސްޓިކް ޓާމިނަލްގެ އެރައިވަލްގެ ކުރިމަތިން، ބުރާއި ދެމެދުގައިވާ ސަރަހައްދަކީ މިހާރު ފަސިންޖަރުން ބޭލުމަށް ޚާއްސަކޮށްފައިވާ ސަރަހައްދެއް ކަމަށެވެ. އަދި އެ ސަރަހައްދުގައި ފަހަރަކު ހަތަރު ޓެކްސީއަށް މަޑުކުރެވޭނެ ސްލޮޓްތައް ފާހަގަކުރެވިފައި ވާނެކަމަށް އެމްއޭސީއެލްއިން ބުންޏެވެ.
އަދި ޑޮމެސްޓިކް ޓާމިނަލްގެ ޑިޕާޗާ ކުރިމަތިން، ބުރާއި ދެމެދުގައިވާ ސަރަހައްދަކީ ފަސިންޖަރުން ޓެކްސީއަށް އެރުމަށްޓަކައި ޚާއްސަ ކުރެވިފައިވާ ސަރަހައްދެއްކަން ފާހަގަކޮށް އެމްއޭސީއެލްއިން ބުނީ އެ ސަރަހައްދުގައި ފަހަރަކު ފަސް ޓެކްސީއަށް މަޑުކުރެވޭނެ ސްލޮޓްތައް ފާހަގަކޮށްފައި ވާނެ ކަމަށެވެ.
މީގެ ކުރީން ވަނީ ވީއައިއޭގެ ސައިކަލު ޕާކިން ޒޯނުގެ މައްސަލައިގައި ވެސް ގިނަ ބަޔަކު ކަންބޮޑުވުން ފާޅުކޮށްފައެވެ. އެކަންވެސް ހައްލުވީ ވަރަށް ގިނަ ދުވަސްތަކެއް ފަހުންނެވެ.
ކިޔުންތެރިންގެ ހިޔާލު